Pisuussutinik uumassusilinnik piujuaannartitsineq toqqammavigalugu atuinissami akaareqatigiinneq

Wednesday 29th of November 2017

Wednesday 29th of November 2017

Inuit Alaska-meersut, Canada-meersut, nunatsinneersut Rusland-imilu Tjukotka-meersut ulluni pingasuni Ottawa-mi ataatsimeeqatigiinnertik 8. november naammasseqqammerpaat, tassanilu kulturikkut piujuaannartitsineq, nerisassaqarnermik qulakkeerinninneq, eqqissisimatitsineq atuinerlu oqaluuserineqarput. Ataatsimiinnermi Inuit kulturikkut pisinnaatitaaffiisa siuarsarnissaat, tassungalu ilaatillugu
piujuaannartitsineq toqqammavigalugu pisuussutinik uumassusilinnik atuisinnaanermut pisinnaatitaaffik siunertaralugit Issittumi killeqarfiit akimorlugit suleqatigiinnissamik naggueqatigiinnillu Inunnik akaarinnissamik kajumissaarisoqarpoq. Ilanngullugulu Issittumi nunat immikkoortui allat Inuttulli assigiimmik pisussaaffeqarnissaannik kajumissaarisoqarpoq, taamatullu killeqarfiit aporfiginagit Issittoq kaajallallugu pisuussutinik
pineqartunik aqutsinissamut alloriarnissat piviusunngorteqquneqarlutik.
Duane Smith, Inuvialuit Regional Corporation-imi siulittaasoq, naapertorlugu pisuussutinik uumassusilinnik atuinissamut pisinnaatitaaffik Nunat Inoqqaavisa Pisinnaatitaaffii pillugit Naalagaaffiit Peqatigiit Nalunaarutaani 2007-meersumi aalajangersagaareerpoq. “Inuit tassaapput inuiaat nunani sisamani assigiinngitsumik naalakkersuinikkut ingerlatsiviusuni misilittagaqartuusunilu najugaqartuusut. Taamaammallu akunnitsinni ikorfartoqatigiissinnaallutalu ilisimasatsinnik akunnitsinnit ilinniagaqarsinnaavugut”. ICC Alaskami siulitaasoq Jimmy Stotts ima oqarpoq: ”Pisuussutinik uumassusilinnik atuinissatsinnik pisinnaatitaaffik nerisassaqarnitsinnut qulakkeerinninnermut toqqammaviuvoq. Taamaattuarsimavoq, tamannalu ilungersuutigiuassavarput”.
Aalisarnermut Piniarnermullu Naalakkersuisoqarfimmi (APN) allaffimmi pisortaq Amalie Jessen ima oqarpoq: ”Sumiiffinni, nunat iluini, nunat immikkoortuini, Issittumi nunat akornanni nunallu tamalaat
akornanni Inuit piniarnermut pisinnaatitaaffiisa siuarsarnissaat sukaternissaallu siunertaralugu Inuit sutigut tamatigut suleqatigiinnissaat pisariaqarluinnarpoq. Taamaaliortoqanngippat Inuit siunissami pisuussutiminnik uumassusilinnik atuisinnaanissaminnut periarfissaarutissapput”.
ICC-p Nunatsinni siulittaasua Hjalmar Dahl ataatsimeeqatigiinneq pillugu naliliigami ima oqarpoq:
“Isumaqarpunga pisuussutinik uumassulinnik naggueqatigiit Inuit ulluni arlalinni
oqaloqatigiillutik ataatsimeeqatigiinnerat imaanaanngitsuusoq. Siunissatsinnut qiviarluta suli annertunerusumik suleqatigiinnissarput ataatsimeeqatigiinnermi qitiuvoq, taamaalillutalu
aappaagu julip 16-anniit 19-at ilanngullugu ICC-p Ataatsimeersuarnissaani
oqaloqatigeeqqissatsinnut pitsassuarnik toqqammavissaqaleratta nuannaarutigaara.”

Subscribe to our newsletter

Subscribe to our newsletter