English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

ICC Nunnat inoqqaavisa FN-imi ataatsimeersuarnerani peqataavoq

TUSAGASSIORFINNUT NALUNAARUT Maajip 19-at, 2011

Naalagaaffiit Peqatigiinni Nunat Inoqqaavisa ataavartumik ataatsimiititaliaat Permanent Forum ukiut qulinngortorsiorluni ataatsimiinnerat ippassaq ammarneqarpoq. Ataatsimiinnermi ICC-p Siulittaasua Aqqaluk Lynge Siulittaasoqarfimmilu pisortaq Sara Olsvig peqataapput. Hjalmar Dahl, ICC-p siulersuisuinut ilaasortaq ataatsimiinnermut kingusinnerusukkut aamma peqataassaaq. Peqataapputtaaq Kirt Ejesiak, Nunavumiit Tatiana Achirgina-lu Tjukotkamiit.

Permanent Forumimi ilaasortat nutaat ukiuni pingasuni atuuttussat ivertinneqarput tassanilu Inoqaterput Alaskameersoq Dr. Dalee S. Dorough Issittormiut sinnerlugit ukiuni aggersuni ilaasorttaassaaq.

Nunat inoqqaavisa kattuffii issittumeersut ataatsimut oqaaseqaataat Aqqaluk Lyngemit saqqumiunneqarpoq. Issittumi kattuffiit suleqatigiittut tassaapput ICC aamma Saamit Siunnersuisoqatigiiffiat. Oqaaseqaammi Nuummi Issittumi Siunnersuisoqatigiit Arktisk Rådip ataatsimiissimanerani angusat oqaatigineqarput kiisalu ICC-p pisuussutinik atuineq pillugu nalunaarutaa qanittukkut Nuummi saqqummiunneqartoq aamma ilanngullugu taaneqarluni.

Ukioq manna nunat inoqqaavinit nunanit tamalaaneersunit unnorujukkaanik Permanent Forum najorneqarpoq, kiisalu Naalagaaffiit Peqatigiinni Naalagaaffiit ilaasortaasut affaasa missaat peqataallutik. Taamaalilluni Permanent Forumi ukioq mannattaaq nunat inoqqaavi pillugit ilisimasanik misilittakkanillu eqqartuiffiussaaq. Ukioq manna ataatsminiinneq Permanent Forumip suliaanik naliliiffiuvoq aammali nunat inoqqaavisa nunaanni aatsitassarsiorneq pisuussutinillu iluaquteqarniarneq sammineqangaatsiassasoq oqaluuserisassani takuneqarsinnaavoq. Permanent Forumip ataatsimiinnera ataasinngornermi maajip 16-ani aallartippoq maajillu 27-ani naassalluni.