English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

4. Februar 2016: ICC-mit tusagassiorfinnut nalunaarut

Inuit Issittormiut Siunnersuisoqatigiiffiata siulersuisuuneri Canada-mi ataatsimeeqqammerput. Tassani Pisuussutit Uumassusillit, Ilinniartitaaneq Aningaasarsiornikkullu Ineriartorneq pillugit ataatsimeersuartitsinissat nalunaarutigineqarput. Ilanngullugu ICC Canada-mi Siulittaasoq Duane Smith ukiuni 17-ini ICC-mi suleqataasimanini pillugu qutsavigineqarpoq

Tulliani ukioq 2018-imi ataatsimeersuarnissap tungaanut qinigaaffiup massuma ukiunik sisamanik sivisussuseqartup ingerlanerani kattuffimmi suliniutissat ingerlanneqartussat nalilersorniarlugit ICC-mi siulersuunerit sapaatip akunnerani kingullermi Canada-mi illoqarfiit pingaarnersaanni Ottawa-mi ataatsimiipput.

Issittumi Siunnersuisoqatigiit, taamatullu Naalagaaffiit Peqatigiit iluini suliniutit ingerlassallu maannakkut qitiutinneqartut qanoq Issittoqarfinnut kinguneqarneri aamma nalilersorneqarput. Taamatuttaaq Kitigaaryimmi Nalunaarut, tassaasoq ukiuni tullinnguuttuni sisamani ICC-p piginnaatitaaffiinik aalajangersarneqartunik imaqartup qanoq siuarsarneqarnissaa nalilersorneqarpoq.

Ilanngullugu ukiuni tulliuttuni Inuit qaffasissumik ataatsimeersuartarnissaat nalunaarutigineqarput. Ataatsimeersuarnerni qulequttat tassaapput Issittumi pisuussutit uumassusillit pillugit ataatsimeersuarnissaq, ukioq manna novembarip qaammataani Canada-mi ingerlanneqartussaq, aningaasarsiornikkut ineriartorneq pillugu ataatsimeersuarnissaq, ukioq 2017-imi februarip qaammataani Alaska-mi ingerlassassatut pilersaarutigineqartoq kiisalu Inuit ilinniartitaanerat pillugu ataatsimeersuarnissaq ukioq 2017-imi nunatsinni ingerlanneqartussatut pilersaarusiorneqartoq. Inuit Rusland-imeersut, Alaska-meersut, Canada-meersut nunatsinneersullu ataatsimeersuarnerni pineqartuni peqataassapput, ataatsimeersuarnerillu tamarmik tulliani ukioq 2018-imi ICC Alaska-mi tamakkiisumik ataatsimeersuaqqitsinnagu pisusaapput.

Ilanngullugu ICC Canada-mi siulittaasup Duane Smith-ip ukiut 17-it ICC-mi sulereernini unitsillugu tunuarniarnini nalunaarutigaa. Duane Smith sapaatip akunnera kingulleq nunap immikkortuani Inuvialuit Regional Corporation (IRC)-mi Nellie Cournoyea taarserlugu siulittaasutut pisortaanertullu toqqagaavoq. Tamatumanilu ICC Canada-mi siulittaasutut tunuarniuteqarluni. Tamassuma kinguneranik Duane Smith-ip taartissaanik toqqaanissaq siunertaralugu ICC Canada maannakkorpiaq suliniuteqarpoq.

Siulersuunerit tulliani ataatsimiinnissaat ukioq manna aggustusip qaammataata naalernerani nunatsinni Qaqortumi ingerlanneqassaaq. Tamatumani Inuit Nunaanni uran-imik atuinermut pilersaarutaasut ingerlanneqareersullu qitiutillugit sammineqarnissaat siulersuisuunernit aalajangerneqarpoq.

Annertunerusumik paasisaqarusukkaanni attaveqarfissaq:

Hjalmar Dahl, ICC Kalaallit Nunaanni Siulittaasoq: Oqarasuaat: 32 36 32