English
Dansk
Kalaallisut

E-mail iccgreenland@remove-this.inuit.org
Phone +299 323632 

Ukiortaami Oqaaseqaat, ICC Kalaallit Nunaat

Januarip 4-anni 2015

ICC Kalaallit Nunaat sinnerlugu nunatsinni innuttaasut tamaasa ukiumi nutaami pilluarnartunik kissaallugit pilluaqquakka.

Inuit Issittormiut Siunnersuisoqatigiiffiat (ICC) juulimi 2014 Inuvimmi Canadamiittumi ataatsimeersuarpoq. Ataatsimeersuarnerup kinguneraa kattuffiup siulersuisuuneqarfia nutaamik siuttortaarmat aammalu ICC Kalaallit Nunaat siuttortaarpoq nutaanillu siulersuisuisoqalerluni.

Ataatsimeersuarnermi inerniliussap Kitigaaryuinit Nalunaarutip ICC-p siulersuisuuneri, naggueqatigiit Inuit ulluinnarni najugaqarfinni tamani, nunat immikkoortuini nunallu tamalaat akornanni, atugarisaasa sutigut tamatigut pitsanngorsarnissaat anguniarlugu suliareqqusanik assigiinngitsunik pisussaaffilerpai. Tamanna ICC Kalaallit Nunaannut aamma imaannanngitsunik unammilligassanik pisussaaffiliivoq Nunatsinni pisortat, soorlu Inatsisartut, Naalakkersuisut, Danmarkimi Nunanut Allanut Ministereqarfik allallu suliffeqarfiit kattuffiillu qanimut peqatigalugit suliarisariaqakkatsinnik.

Ataatsimeersuarnermi inerniliussap innersuussutaasa ilaanni, qitiusumik pisortaqarfiit kattuffiillu suleqatigalugit ICC-mi ukiut qinersiviusut tulliuttut sisamat ingerlaneranni ICC-mi siuttut peqquneqarput ilaatigut makkuninnga suliaqaqqullugit;

- Aningaasarsiorneq pillugu Inuit Issittormiut Ataatsimeersuarnissaannik pilersaarusioqqullugit ingerlatseqqullugillu, ataatsimeersuarnermilu tassani Inuit suliffeqarfiutaasa suleqatigiissinnaanerat misissorneqassasoq Inuillu suliffeqarfiutaasa akunnerminni misilittakkaminnik agguaaqatigiinnissaat aqqutissiorneqassasoq.

- Inuit isumannaatsunik aarlerinartortaqanngitsunillu inuussutissaqarnikkut tunngaviliisussamik Inuit inuusaasiat aallaavigalugu naalakkersuinikkut, inooqatigiinnikkut, aningaasarsiornikkullu avatangiisinik pilersitsiniarnermi Inuit nukissaqalersinneqarnissaat aqqutissioqqullugu, tassanilu uumasunik iluaquteqarniarnermik aqutsineq pillugu Inuit ataatsimeersuartinneqarnissaannik pilersarusioqqullugu ingerlatseqqullugulu.

"Qulaani suliassat ilaattut oqaatigineqartut piviusunngortinneqarnerisigut uagut Inuit qanimut suleqatigiinnitsigut aningaasarsiornikkut ataatsimut anguniagaqarnissarput allartissinnaavarput aammalu annertusiartortumik inuussutissatigut nammineq pilersorsinnaanerput qaffatsillugu," ICC Kalaallit Nunaanni siulittaasoq Hjalmar Dahl ukiortaami oqaaseqaammini ilaatigut oqarpoq.

ICC-p Nunatsinni, Canadami, Alaskami Tjukotkamilu immikkoortortaqarfii maanna suliassatik pillugit aaqqissuussereerput, ukiunilu tulliuttuni sisamani suliassatik piareersareerlugit. Kattuffiup siulersuisuunerit januarip qeqqani Nuummi atatsimiissapput, tassanilu Kitigaaryuinit Nalunaarummi suliassiissutit aallaavigalugit suliassat agguataarneqarnissaat aamma eqqartorneqassallutik.

"Soorunami suliat ingerlaavartut, soorlu toqqaannartumi ataavartumillu Issittumi Siunnersuisoqatigiinni taasumalu suleqatigiiffiini ataqqineqartumik suleqataanitsinnut sunniuteqarnerput ingerlaanassasoq," Hjalmar Dahlip naqissuserpaa.

Nunarsuarmi nunat inoqqaavisa pisinnaatitaaffii pillugit ICC-p ilungersuuteqarnini nangissavaa, pingaartumik pisinnaatitaaffiit pineqartut nunagisatsinni nunanilu tamalaanni atuutsilersinneqarnissaat eqqarsaatigalugu.

Septemberimi 2014 Nalagaaffiit Peqatigiit (FN) nunat inoqqaavi pillugit siullerpaamik ataatsimeersuartitsimmat nunat inoqqaavisa pisinnaatitaaffii qitiulluinnarput.

"Pisinnaatitaaffiit pillugit nunani avannarlerni naalagaaffiit FN-imut ilaasortaasut, soorlu Danmark/Kalaallit Nunaat aamma peqatigalugit oqaloqatigiinnerit aallartereerpavut. Tassani nunat inoqqaavisa pisinnaatitaaffiisa atuutilersinneqarnissaannik FN-ip atatsimeersuartitsinerani inerniliussami oqaatigineqartut aallaavigineqarput," Hjalmar Dahlip naggataatigut ilanngullugu ilisimatitsissutigaa.

Kinguneqarluartumik suleqatigiinnissaq neriuutigalugu tamanut ukiortaami pilluaqqusivunga.

Hjalmar Dahl
ICC Kalaallit Nunaata siulittaasua