English
Dansk
Kalaallisut

E-mail iccgreenland@remove-this.inuit.org
Phone +299 323632 

Inatsisartortaanut Naalakkersuisunngortussanullu pilluaqqussut

Tusagassiorfitsigut nalunaarut, Nuummi, decembarip 7-anni 2014

Inatsisartunut qinersinerput naammassivoq Inatsisartunullu ilaasortat nutaat katersuuttussanngorput. Nunatsinni Inuit Issittormiut Siunnersuisoqatigiiffiat (ICC) sinnerlugu Inatsisartunut ilaasortanngorlaat qinigaaqqittullu taamaasa pilluaqquakka. Siumut, Demokraatit Atassullu Naalakkersuisoqatigiinnissamik nutaamik isumaqatigiissuteqarput. Ulluni aggersuni Naalakkersuisunngortussat saqqummiunneqassapput. Manna iluatsillugu Naalakkersuisunngortussanut pilluaqqusutiga apuukkusuppara.

Inuit Issittormiut Siunnersuisoqatigiiffianni (ICC) kisaatigaarput Inatsisartut nutaat Naalakkersuisunngortussallu inerititalimmik ICC-mik suleqateqarnertik nangissagat, ilaatigut nunat inoqqaavisa pisinnaatitaaffiinik atuutilersitsinikkut, avatangiisitigut kulturikkullu aamma nunat tamalaat akornanni suleqatigiissutivut soorlu Issittumi Siunnersuisoqatigiinni aamma Naalagaaffiit Peqatigiinni suliavut eqqarsaatigalugit.

Suleqatigiinnerup nangeqqinnissaa qilanaaraara, pingaartumik Naalakkersuisoqatigiinnissamik isumaqatigiissummi aamma oqaatigiineqarmat; inuiaqatigiit ineriartornerat nunarsuarmioqatigiinnermilu nukittuumik inissisimanerat annerulerseqqullugit Partiit suleqatigiilersut naalakkersuinikkut siunnerfeqaqatigiillutik sulissasut, minnerunngitsumillu Inatsisartuniinnanngitsoq Naalakkersuisuniinnaanngitsorlu aammalu inuiaqatigiinni tamani suleqatigiinnissap siuarsaavigineqarnissaa sulissutigineqarniarmat.

- Tamanna isumalluarfigeqaara pingaartumik suliassani annertuuni innutaasunik qanimut peqataatitsinissap annertusarnissaa eqqarsaatigalu; ICC Kalaallit Nunaanni siulittaasoq Hjalmar Dahl pilluaqqussutini naggaserlugu oqarpoq.

Hjalmar Dahl
ICC Kalaallit Nunaata siulittaasua