English
Dansk
Kalaallisut

E-mail iccgreenland@remove-this.inuit.org
Phone +299 323632 

Inuit Issittormiut nunarsuarmi siuttunut noqqaassuteqarput Issittumi Silap Pissusiata Allanngoriartornera pillugu COP15-mi qanoq iliuuseqarnissaannik

Ingerlaannaq saqqummiussassaq 

Novembarip 13-a 2009 – Københavnimi – naggueqatigiit Inuit siuttui, Inuit Issittormiut Siunnersuisoqatigiiffiat, ICC aqqutigalugu ullumikkut <media 260>nalunaarummik </media>saqqummiussipput, nunarsuarmi siuttunut noqqaassutigalugu ukioru Københavnimi Silap Pissusaata Allanngornera pillugu ataatsimeersuarnissami kinguneqarluartussamik isumaqatigeeqqusissummik, siunissami issittumik serniginnittussamik. Ilisimatuut issittoq tassaanerarpaat silap pissusaata allanngornerata kingunerisaanik isumaalunnarnerpaajusussaq, ICC-llu nunarsuarmi siuttunut issittup nunarsuup silaanut immallu sarfaanut pingaaruteqassusia erseqqissaatigaa.

ICC-p siulittaasua James Stotts, ullumikkut aamma Københavnimiittoq, Issittumi Siunnersuisoqatigiiffiata, Arktisk Rådip ilaasortaasa qaffasissumik atorfilittai naapeqatigivai, nalunaarummillu saqqummiussiffigalugit. Tassani oqaatigivaa: ”Issittoq tassaavoq silap pissusaata allanngornerata qiterpiaa. Inuit ileqqui piniakkanillu atuinerat innarlerneqareerpoq.” ”Decembarimi ataatsimeersuarnissaq tassaavoq silap pissusia pillugu ataatsimeersuartarnerit 15-issaat (CoP15), taannalu tassaasussaavoq taamatut ataatsimeersuartarnerni pingaarnerpaaq”, nangilluni oqarpoq. ”Nunarsuarmi siuttunut oqariartuuterput paasiuminarpoq, tassaalluni piffissaajaqqissinnaanngilagut.”

Aqqaluk Lynge, ICC-mi Nunatsinni siulittaasoq oqarpoq CoP15-mi Nunap inoqqaavisut qaaqqusisuunerminni Inuit erseqqissumik naalakkersuinikkut sulialinnut oqariartuutigissagaat suliassap qanoq iliuseqarfiginissaata nukingernartuunera. ”Naalakkersuinikkut siuttut COP15-imi sakkortunerpaamik isumaqatigiissuteqartariaqarput nunagisavut illersorniarlugit.” ilanngullugulu oqaatigalugu sermersuup aakkiartupiloornerata takussutissikkaatigut Inuit tassaammata sakkortunerpaamik allannguutinut eqqugaasussat. Naggasiillunilu oqarluni: ”Naleqqussarnissatsinnut sakkussatsinnik pisariaqartitsivugut.”

Nalunaarummi COP15-ip iluatsilluartumik inerneqarnissaanut pinngitsooratik anguniagassat arfinillit taakkartorneqarput. Inuillu siuttuisa tamakku tamanut takusassianngorlugit ippassaq suaarutigaat. Tamatumunnga oqaaseqarluni, Edvard Ittap, ICC Alaskami siulittaasuusup oqaatigaa Københavnimi ataatsimeersuarnerup iluatsilluartumik inerneqarnissaanut anguniagassat pingaarnersaat tassaassasoq naleqqussarnissamut qanoq iliuuserisassat isumaqatigiissutiginissaat. ”Inuit oqaatigineqartarpugut nunani siuarsimasuni najugaqartuusutut. Massakkorpiarli nunaqarfiit nutsernissaat piareersarfigaavut, attaveqaatillu nutaamik aaqqissuullugit ingerlavugut nunap qeriuaannartup aakkiartornera pisuulluni sinerissattalu neriorneqarluni imaanut nakkaanera peqqutaalluni.” Edvard Itta North Slope Boroughimi, USA-mi inoqarfiit avannarpasinnerpaartaaneersoq aamma borgmesteriusoq naggasiilluni oqarpoq.

Inuit nunarsuarmi siuttunut ikiuussinnaanertik aamma neqeroorutigaat. Tatiana Achirgina, ICC-p Tjukotkami siulittaasua, Anadyrimit tamanna pillugu imak oqarpoq: ”Qangaaniit ilisimasavut iluaqutissatut neqeroorutigaavut, taakkumi tassaammata pinngortitami inuunitsinni avatangiisit pillugit ilisimalersimasavut, kinguaariippassuarni kingornuttarsimasagut.” Silap pissusaa pillugu ilisimatusarnerni qangaaniit ilisimasat iluaqutaalluinnartumik inissisimalersimapput, Achirgina oqarpoq, FN-imilu nunanut ilaasortaasunut ilisimatuunullu tamanna isumaliutigeqquaa, oqarluni: ”ilisimasat taamakku silap pissusaata allanngoriartornerata kingunerisassaanut aammalu naleqqussarnissamut iluaqutiginiarneqartariaqarput.”

Duane Smith, ICC-p Canadami siulittaasua, Inuvimmiit oqarpoq, Inuit najugaqarfiinut naleqqussakkanik sakkussatigut ineriartortitsineq siumut ingerlaqqinnissamut pingaaruteqarluinnartoq. Nangillunilu: Issittumi inuiaqatigiit pisariaqartitaat tassaapput mingutsitsinngitsunik pijujuaannartitsinerlu tunngavigalugu ineriartortitsinissaq, tamannami inuuniarnikkut akisoqisumi najugalinnut pinngitsoorani iluaqusiisammat. Taamaakkaluartoq mingutsitsinngitsumik nukissiuutitigut atortulersorneq suli akisuallaarpoq.” Pingaartutut oqariartuutigerusuppaa isumaqatigiissut iluatsilluassappat pinngitsoorani imarisariaqaraa ”inuiaqatigiinnut mingutsitsinngitsunik atortulersornissamut aqqutissiueqataanissaq.”

Inuit siuttui Københavimi decembarimi ataatsimeersuarnissami aamma peqataasussaapput FN-imi nunanut ilaasortaasunut nalunaarutip imarisaanik eqqaasitsiartorlutik. Tamatumunnga tunngatillugu James Stotts oqarpoq: ” neriuutigaarput nunarsuup siuttuisa tusaaniarumaaraatigut.”

Inuit Issittormiut nunarsuarmi siuttunut noqqaassutaat/Call to Global Leaders <media 239>uani</media> takuneqarsinnaavoq

Paasisaqarnerorusuttunut saaffissat ukuupput:

 

Københavnimi: 
Chester Reimer 
Oqarasuaat: +1 613 355 7765
reimer@remove-this.crcionline.com 

Nunatsinni:
Aqqaluk Lynge
Oqarasuaat: +299 32 36 32
aqqaluk@remove-this.inuit.org

ICC Chair Office (Alaska):
Jim Stotts
Oqarasuaat. +1 907 274 9058
jimmy@remove-this.iccalaska.org

Canadami: 
Corinne Gray 
Oqarasuaat: +1 613 563 2642 
cgray@remove-this.inuitcircumpolar.com 

Chukotkami, Rusland:
Tatiana Achirgina
Oqarasuaat: +7 42 722 24504
dareva44@remove-this.mail.ru