English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Naggueqatigiit Inuit Europamiunut saaffiginnissutigaat puisinniartarnertik inuusaasertillu illersoqqullugu

2006

Nuuk Kalaallit Nunaat - Inuit Kalaallit Nunatsinniittut aarlerissutigaat Europami illoqarfissuarnit nalunaarutigineqartoq naalagaaffiit ilaat isumaliuteqartut puisit amiinik eqqussuinermut killilersuutinik inatsisiliorniarlutik
“Europamiut naalakkersuisuilu tamaasa matumuuna saaffigaakka inooriaaserput aallaavigalugu niuernernitsinnik killilersuineq sunaluunniit taamaateqqullugu,” Aqqaluk Lynge, ICC-mi Kalaallit Nunaanni siulittaasoq oqarpoq. “Puisinniariaaseq qangaaniilli ingerlatarput piujuartitsinermik tunngaveqarpoq. Kalaallit Nunaanni innuttaasunut kalaaliminissaqarniarnikkut pilersuisuuvoq, puisillu amiinik atisalianik Europamut niuerneq nunaqqatigiinnut pissaqarnermut tapertaalluarpoq.”
Sapaatit akunnerini kingullerni Europami tusagassiorfinniit Kalaallit Nunaanni politikerit inuiaqatigiillu pigisaata puisit amiinik nioqqutissiorfiup Great Greenlandip akornanni oqallinnerit paatsuunganartumik allamullu sangutitsisumik nalunaarutigineqartarput. Oqallinnermi tassani qitiuvoq nioqqutissiorfik taanna qanoq annertutigisumik puisit amiinik akitsinni Canadameersunik tunisassiortassanersoq.
Naalagaaffinni naalakkersuisut ilaasa tusagassiorfiit nalunaarutaat imatut paasisimavaat Kalaallit Nunaat puisit amiinik Canadameersunik eqqusseqqusiunnaavissoq. ICC-llu aarleqqutigaa naalakkersuisut ilaat inatsisiliornialersaarpalummata eqqunngilluinnartumik paasissutissitaaneq tamanna tunngavigalugu.
ICC-taaq aarleqqutigaa uumasunik illersuiniaqatigiiffiit inunnik tusaamasanik sulisitaqalersimammata eqqunngitsumik tunngavilinnik oqariartuuteqartittakkaminnik. “Neriuutigaara Paul McCartney-p maanga tikeraarsinnaassagaatigut isertuaatsumillu, ilumoortumik paasisimannitumillu maani nunatsinni inuusaaserput pillugu oqaloqatigaluta,” Aqqaluk Lynge oqarpoq, “ nunat inoqqaavinut piniarnermullu akerlilersuisunit uumasunik illersuiniaqatigiinnit namminerminut tusagassiorfitsigut oqaatigeqqusaasut atornagit.”
ICC-p Paul McCartney Europamiullu allat qinnuigiumavai ajornartorsiutaasup qiterisaanik sammisaqaqqullugit, tassalu Inuit suliniarneranni ikioqqullugit, taakkumi akerlilersormatigik suliniaqatigiiffiit uumasunik illersuiniarnerminni ingasaassisut aamma periarfissat suulluunniit atorlugit nikanarsaaniartut piniarnermik, nunamilu imaanilu piujuartitsisumik inuussutissarsiuteqarnermik ingerlatsisunut. “Paul McCartneyp CNN-ikkut apersorneqarnera takuara”, Aqqaluk Lynge nangippoq, “Tupinnaqaaq Kalaallit Nunaat eqqunngitsuliornerminni ilanngukkamikku oqarlutik kalaallit canadamiut nioqqutissiaannik equsseqqusiunnaarsimasut. oqaaserisaasa 90 procentii piumasaarsuutaapput, tamannartaalu namminerluunniit paasinngilaa”.
“Naalagaaffinni naalakkersuisut, Nunarsuarmi Niuernikkut Kattuffissuarmut, World Trade Organisationimut (WTO) ilaasut eqqarsarluaqqissaaqqunaqaat, uumasunik illersuiniat oqariartuutaannik tusaanialinnginnerminni, taamaaliorunimmi nunat inoqqaavisa tunisassiaannut, inatsisit uniorlugit inerteqqusiortitaassagamik,” Aqqaluk Lynge naggasiilluni oqarpoq.
ICC Inuit Ruslandimiit Alaskamiit Canadamiit Kalaallit Nunaanniillu kattuffigaat 1977-imi tunngavilerneqartoq siuarsarniarlugit Inuit ataatsimoornerat, kulturiat, oqaasii aamma qangaaniit inooriaasiat. Nunatsinni innuttaasut tamarluinnangajammik tassaapput Inuit.

Paasiniaajumaguit attavigiuk:
Aqqaluk Lynge,
ICC Kalaallit Nunaanni Siulittaasoq
Oqarasuaat: +299 32 36 32
E-mail: aqqaluk@remove-this.inuit.org