English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Aqqaluk Lynge ilumoorpoq

Canadami aviisimi Nunatsiaqnews-imi januarip 30-ani pingaarnertut allaaserisaq

Aqqaluk Lynge ICC-iip Kalaallit Nunaanni Præsidentiata naggueqatigiit Inuit akornanni assigiimmik allattaaseqalernissaq pillugu qangaaniilli Kalaallinit anguniagaasoq saqqummiuteqqippaa.

ICC-iip siulersuisuunerisa ataatsimiinnerat iluatsillugu Iqalunni CBC-mi apersorneqarnermini Aqqaluk Lynge-p Canadami naggueqatigiit Inuit tusarnaartut eqqissisaraluarpai ICC-mit allattaaseq syllabics taarserniarneqanngitsoq kisiannili ilapittuuserniarneqartoq.

Naak Aqqaluk Lynge-p siunnersuutaa ersarikkaluartoq ilumoorlunilu, qularnanngitsumik sunniuteqarnavianngilaq-aasiit. Canadami inuit siuttui qangaaniilli allattaatsimut tunngasunik 1980-ikuniilli ICC pilersinneqarmat sunniuteqarniarsimagaluarput.

Inuit siuttuisa ilaasa soorlu John Amagoalik-ip Jose Kusugak-lu qangaaniilli issittumi assigiimmik allattaaseqarnissaq sulissutigisimagaluarpaat allaat syllabics (akilinermiut naqinneri titartagaasat) romamiut naqinneranik taarserniaraluarlugit. Kisiannili siunnersuutitsialaat piviusunngunngitsoortuarput Canadap kangiata avannaamiut syllabics-inik atuinermik pingaartitseqisut nutaaliornissamut kajuminnginnerannik.

Taalliortutut qinikkatullu Aqqaluk Lynge-p allatat kimeqarnerat nalunngilluinnarpai. Nalunngilaattaaq oqaaseq aalajangersimasumik allattaaseqanngitsoq sorortarmat nungussinnaallunilu, soorlu tamanna oqaluttuarisaanermi uteqattaartuartutut takussaaqisoq. Paasisimalluinnarpaalu assigiinngitsunik allattaaseqarnerup naggueqatigiit assigiissuseqaraluaqisut attaveqaqatigiissinnaannginnertik patsisigalugu ataatsimoorsinnaanerat killilersorneqartartoq.

Nunavummi Inuktitut ilinniartitsinermik suliniuteqartut suaarutigiuarpaat Inuktitut ilinniutinik atuagassanillu. Kalaallit Nunaanni aningaasalersorluakkamik naqitatigut ingerlatsiviusumi ukiuni 150-ni kingullerni atuakkianik, ilinniutinik quppersakkanik aviisinillu saqqummersitsisoqartarsimavoq.

Allattugaaterpassuilli tamakku Canadami Inuit oqaasiinik atuisunit amerlanerpaanit paasineqarsinnaangillat. Assigisaanik kalaallit naggueqatiminnik Canadamiittunik attaveqarniaraluarunik pinngitsoornatik tuluttut allattariaqartarput, tamanna killeqarfiit pitarlugit attaveqaqatigiinnermi oqaasiulermat nalinginnaasoq. Tamannalu ICC-iip 1977-mi pilersinneqarneranut isummamut tunngaviusumut tassaqa tulluuppa.

Assigiimmik allattaaseqalerniarnissamut aqqut takigaluaqaaq pisariugaluaqaluni. Kisiannili Nunavummi saqqummiunneqaraangat kinguartinneqartuarpoq. Ulorianartua unaaratarsinnaavoq; kinguartitsineq kingullerpaaq atortitsisoqaleraluarpat immaqa kingusinaartoq.