English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Akerliuneq ersarilluartoq

Danmark-ip, USA-p Kalaallit Nunaatalu naalakkersuisuisa Uummannap Inughuarnut utertinneqarnissaanut isumaqatigiissutaat atsiorneqalermat inuit 400 missaat ingerlaarnermut ICC-imit, Hingitaq 53-imit, Inuit Youth International-imillu aaqqissorneqartumut akerliussutsiminnik takutitsipput

-Killuussisoq, Atsioqinak! oqaatsillu ilaatigut taamak sakkortutigisut nilliaatigineqarput ullumi naalakkersuisut siulittaasuat Hans Enoksen oqaaseqaatit akerliunermik imaqartut akigamigit ilaatigut oqarluni:-nuannaarutigalugu isumaqatigiissut atsiussavara.

Atsioqatigiinneq danskit, amerikamiut naalakkersuisuinit ukiaq septemberimi isumaqatigiinnerannit aallaaveqartoq pingaartorsiutigineqarluni Hans Egedep illuani atsiorneqarpoq.

Angalaarnermut aaqqissuisoq Aqqaluk Lynge Inatsisartut ataatsimiittarfiata silataani Hingitaq 53-ip danskit naalagaaffiannut eqqartuussisulersuinera eqqartoreeramiuk ilaatigut imak nangippoq:-....tamanna utaqqillannguarnagu katsorna Hans Egedep illutoqaani Pituffimmi sakkutooqarfiup ilanngarneqarnera atsioqatigiissutigineqassaaq. Avanersuarmiut avaqqutiinnarlugit suliaq ingerlanneqarsimasoq, pissutsinik allannguinngitsoq- ilami suli imaattussaassaaq uagut Kitaamiut Thulimukassagaluarutta aatsaat USA apereqqarlugu-aali nunatsinni!

Inatsisartut ataatsimiittarfiata silataani oqaaseqarportaaq Nitta Lyberth, Inuit Youth Internationalimi siulittaasoq, oqalugiarnermini naalakkersuisut siulittaasuat inappaa sinniisuuffigisami piumasaat pingaartinneroqqullugu qulaajaaginnarlunilu aalajangiisarneq qimaqqullugu.

 

 

Atsioqatigiinnissaq inissinneqarsimavoq Hans Egedep illutoqaanut, nalunarpoq eqqarsaatigilluarneqar-simanersoq Hans Egede tassammat Kalaallit Nunaannik Qallunaat kunngeqarfiannut tunniussisoq taamaalillunilu kalaallit imminut oqartussaanerannut killilersueqqaartoq. Isumaqatigiissut annertunerusumik kalaallinut ingammillu nunami najugaqaqqaarsimasunut Inughuarnut annertunerusumik sunniuteqanngilaq. Oqartussaassusermi suli amerikkarmiut naalagaaffiannit aalajangerneqartassaaq, soorlu kitaamiut taavunngarniarunik amerikkarmiut akuersissummik qinnuigeqqaartassavaat.

Atsioqatigiiffissap silataatungaani Avanersuup Kommuniata borgmesteria Naimanngitsoq Petersen oqalugiareermat Hingitaq 53 sinnerlugu Maassannguaq Qujaukitsoq oqalugiarnermini ilaatigut imak oqarpoq:-Naammappoq artukkerneqartuaannarneq, naammappoq qulaatiinnarluta iliortoqartarneq, naammappoq inuiaqatigiittut naleqanngitsuttut isigineqartuaannarnerput, naammaqaarmi pisinnaatitaaffeqannginnitta annertuallaarnerujussua.

Oqalugiartunut ilaapputtaaq KNAPK-uup siulittaasua Leif Fontein, peqatigiiffiup Nammineq-mi siulittaasoq, Elisabeth Ravn Johansen.