English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Sheila Watt-Cloutier Chukotkami

Chukotkami Inuit akornanni nutaamik neriuuteqalerneq, nukissaqalerneq tunniutiinnarusunnginnerlu

Ottawa Julip pingajuat 2003

Junip 24-ani Providenjamiit New Chaplinomillu Chukotkami, Ruslandip kangerpasinnerpaaniit Sheila Watt-Cloutier, ICC-iip siulittaasua Iqalunni Nunavummi najugaqartoq, uterluni nalunaarpoq taavani Inuit 1500 missaaniittut akornanni siunissamut isumalluarneq neriunnerlu malugisimallugu, neriunnerup isumalluarnerullu saniatigut Alaskami, Canadami Kalaallit Nunaannilu Inuit suliniaqatigiiffiinik piujuartitsinissaq tunngavigalugu inuuneq, Inuit kulturiannik illersuiniarneq pingaartitsinerlu pillugit suleqateqarusunneq maluginiarpaa.

-Ukiut sisamat matuma siorna ICC-ip Chukotkami Inuit nerisassanik nakorsaatissanillu ikiorpaat. Tamannali maanna allanngorpoq. Chukotkap Guvenøriata, Roman Abramovitch-ip sulisuisalu suleqataalluarneratigut Chukotkami Inuit inuunerminni atugaat takussaasumik pitsanngoriarsimapput. Inuit neriunnermik, anguniagaqarusunnermik naleraqalernermillu nutaamik misigisaqalersimapput taamaalillutillu imminut napatinniarnissamut nukissaqalersimallutik, Watt-Cloutier oqarpoq.

Inuuniarnermi ajornartorsiutit suli atuupput inuuniarnermilu atukkat Amerikkap issittortaani atukkanit ajornarnerupput, taamaakkaluartoq Watt-Cloutier-ip nuannaarutiginerarpaa Canadamiut suliffeqarfiutaata Yellowknife-meersup FSC-ip, Ferguson, Simek and Clark, New Chaplinomi, Beringip ikerasaaniittumi illulioqataasimanera. Watt-Cloutier oqaluttuunneqarsimavoq qanoq taavani najugaqartut illunik tuniniaanerup kingorna FSC-mit sullissinermik atugarititassanik iluarisimaarinnitsigisimasut.

Ludmilla Ainana-p, Chukotkami Yupiit kattuffiata siulittaasua kiisalu Natalia Rodionova-p ICC-Chukotkami siulittaasup ilumoornerarpaat Chukotkami aningaasarsiornikkut siuariartornerup ingerlaarnera russit aningaasaata 1998-imi naleerunnerata kingorna. Ilumoornerarpaattaaq attaveqaqatigiinnerup iluani illussaqartitsinerullu iluani aningaasaliinerit nutarterneqarnerat. Ilanngullugu Ludmilla Ainana-p oqaatigaa Chukotkami Inuit tassaajunnaarmata avinngarusimasumi kiserliortut. Canadami, Alaskami Kalaallit Nunaannilu kammalaativut suleqatiginarpavut. Namminersornerulluni naalakkersorneq Nunavummiit, Nunavimmiit Kalaallit Nunaanniillu ilinniarpavut.

Irina Appa, Inuk Providenjameersoq, maanna ICC Canadami atorfeqartoq, Sheila Watt-Cloutier angalaqatigaa. Ukiuni arfineq pingasuni ilaquttani takusimanagit naapikkamigit, Sheila Watt-Cloutier Canadamiunit aningaasalersorneqartumik sanaalukkanik eqqumiitsulianillu tuniniaaffiusussamik pilersitseqatigaa. Tamanna nunaqqatigiit aningaasarsiornikkut siuarsarniarnissaanut ilapittuutissatut pilersinneqarpoq.

Aallarnisaaneq ineriartortinneqarpoq ICC Canada-p ingerlaavartumik suliniutaanut, Ruslandip avannaani Nunap inoqqaavisa suliniaqatigiiffiinnik pilersitsiortornermut atasuuvoq, siunertarineqarporlu Chukotkami eqqumiitsuliortut sanaaluttartullu suleqatigiiffeqalernissaat, ataatsimik aqunneqartumik tuniniaaffeqaalernissaat, pitsaassusermik naliliisarfeqalernissaat kiisalu suliap suuneranik nalunaarsueriaatsimik pilersitsisoqarnissaa. Tamanna ilaatigut makkunanit aningaasalersorneqarpoq, ICC Canada, ICC Chukotka, Chukotkami naalakkersuisut kiisalu Cherny International Inc. Sweitzimiut Inuit eqqumiitsuliaannik tuniniaasartut. Taassuma suliniutip takutippaa Ruslandip kangerpiaani aningaasarsiornikkut ineriartortitsiniarnerup ingerlaarnissaanut qanoq nunani tamani suleqatigiinnerup pingaarluinnartiginera.

Sheila Watt-Cloutier-ip Guvenør Abramovitch, Moskvami Chukotkamik aqutsisoqarfimmit ikiorneqarluni Inuit suliniaqatigiiffiinik suleqateqarnera nuannaarutigingaarnerarpaa, neriorsuillunilu Chukotkamut utissalluni.