English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Nunat inoqqaavi Geneve-mi

Nunat inoqqaavisa atugaat pillugit immikkut ilisimasallit ataatsimiittartoqatigiivi ulluni makkunani FN-ip Geneve-mi allaffeqarfissuani ataatsimiiput. Ataatsimiinnermi tallimanngorpat 14. August naammassisussami nunarsuaq tamakkerlugu nunat inoqqaavisa sinniisaat 400-it pallillugit peqataaniarlutik nalunaarsimapput. Nunatsinni ICC-mi atorfilik Sara Olsvig aamma ICC-p FN-imi suliat pillugu atatsimiititaliaani ilaasortaq Hjalmar Dahl peqataapput.

Ilinniartitaaneq qitiutillugu

FN-imi nunat inoqqaavisa atugaat pillugit ataatsimeeqatigiinnermi nunat inoqqaavisa ilinniartitaanikkut atugaat periarfissaallu pillugit nalunaarut aallaavigalugu oqallinneq ingerlanneqarpoq. Oqallinnermi ilinniartitaanerup pingaaruteqarnera minnerunngitsumillu nunat inoqqaavisa nunarsuarmi sumiikkaluartut suli ilinniartitaanikkut annikippallaamik periarfissaqartinneqarnerat allaallu ilinniartitaasinnaannikkut naqisimaneqarnerat eqqartorneqarput. Pingaartinneqarpoq Naalagaaffiit Peqatigiit FN aqqutigalugu ullumikkornit suli annertunerusumik ilinniartitaanikkut pisinnaatitaaffiit aamma nunat inoqqaavinut atuuttut ilungersuutigineqarnerunissaat anguniartariaqartoq.

Pisinnaatitaaffiit atuutinneqarnerat

Nunat inoqqaavisa pisinnaatitaaffii 7. September 2007 FN-imit akuerineqartut ulluni makunani nunani tamalaanni atuutinneqalernissaat ilungersuutigineqarpoq. Ataatsimiinnermi ilaatigut nalunaarutigineqarpoq nunani arlalissuarni nunat inoqqaavisa pisinnaatitaaffii atorluarneqalereersimasut. Ilanngullugu nalunaarutigineqarpoq 7. september 2007-mi FN-imi akuerseqataanngitsut soorlu, USA, Canada aamma Australia massakkut akuersinissamik sulissutiginnittut. Tamanna ataatsimiittunit nuannaarutigineqarpoq kissaatigineqarluni nunat siunissami amerlanerusut pisinnaatitaaffinnik taakkuninnga atortuulersitsissasut.

Naalakkersuisut siulittaasuat oqalugiarpoq

Marlunngorneq 11. August nunatsinni Naalakkersuisut siulittaasuat Kuupik Kleist ataatsimiittunut oqalugiarpoq. Naalakkersuisut siulittaasuata nunatsinni 21. juni Namminersulernerup imarisai pillugit oqalugiaatimini ataatsimeersuartunut nalunaarutigai. Nunatsinni namminersulersimaneq minnerunngitsumillu kalaallit inuiattut akuerineqarnerat oqaatsillu pisortatigoortumik akuerineqarlutik atuutsinneqalernerat ataatsimeeqataasunit maligassatut isigineqarlutik pilluaqqussutigineqallattaarput.

Kalaallit Nunaat Danmarkilu suleqatigiillutik Namminersornermik pilersitsisutut nunat inoqqaavinit allanik aqqutissiuisutut arlalinnit maligassatut isigineqarpoq. Peqatigiilluni eqqissisimasumillu Naalagaaffiup nunallu inoqqaavisa akornanni isumaqatigiinniarnerit angusaqarfiulluarnerat Danmarkip Kalaallillu Nunaata takutippaa, ilaatigut oqartoqarpoq.

Sara Olsvig: +45 28731978

Hjalmar Dahl: +299 556126