English
Dansk
Kalaallisut

E-mail iccgreenland@remove-this.inuit.org
Phone +299 323632 

ICC-iip siulersuisuuneri Alaskami ataatsimiipput

Inuit Issittormiut Kattuffiata siulersuisuuneri Nome-mi Alaskami juunip 26-ni 27-anilu ataatsimiipput. Ataatsimiinnermi erseqqissaqqinneqarpoq Inuit inuusaasiannik siunissami aamma inuusinnaaneq, ingammik issittumi inuuffigisatsinni avataaniit sunnertikkiartorneq tunngavigalu.

Akuutissat arrortikkuminaatsut inuuniutitsinnut inuuffitsinnullu sunniukkiartuaarnerat akiorparput soorluli taakku naammanngitsut aamma inooriaatsitsinnut ulorianartorsiortitsisut allat sorsuttariaqalerpagut, Sheila Watt-Cloutier, ICC-iip siulittaasua oqarpoq nangillunilu:-Nunarsuup kiatsikkiartupiloornera gassinik silaannarsuarmut qaffakaasunik aallaveqartoq Inuit qangarsuaaniilli ileqqutoqqatik malillugit angalasarsimanerannik uloriarnartorsiortinnermikkinguneqarpoq . Tamanna uagutsinnut tassaavoq inuttut pisinnaatitaaffitsinnik inuiattullu ataavarnissatsinnut serlersaarisoq. Taamatut ineriartorneq sapinngisarput tamaat akiorniartariaqarparput. Tamanna nunat tamalaat akornanni suliniaqatigiiffinnut suliassanngortittariaqassappat taamak iliuuseqartariaqarpugut, aatsaat taamaalinikkut nunarsuarmioqatitsinnut inissisimanerput takutissinnaavarput, Watt-Cloutier oqarpoq.

 

Nunarsuup kiatsikkiartuaarnera kisimi sammineqanngilaq. Siulersuisuunerimmi aamma naggueqatigiit Inuit eqqarsartaatsimikkut kulturimikkullu pigisaat serlersaarneqartut eqeersimaarfigaat.

-Sanaalukkat ilaarneqartarput niuertarfinnilu tuniniarneqartarlutik, nalunngilarput Alaskamiinnaq nunap inoqqaavisa sanaalugaannik tuniniaanermi 40 mio. US $-nik naleqartumi 75-80 procentit tassaasut avataanit eqqussukkat, nunap inoqqaavisa sanaalugaannik ilaarsinerit, ilaannikkut allagartalersorneqartarlutik soorlu nunap inoqqaavisa sanaalugaattut, erseqqissaavoq Violet Ford, Canadamiit siulersuisuunernut ilaasortaq inatsisilerituutut ilisimatuunngorniarnermini tamakkorpianik ilisimatunngorniuteqartoq. "Taamatut iliuuseqartarneq unitsinneqartariaqarpoq. Suliffeqarfiit inuillu ataasiakkaat naggueqatigiit Inuit neqitsiullugit taamatut iluarnaarniuteqartut piumasaqarfigaagut iliuutsitik unitsissagaat, Violet Ford oqarpoq.

 

ICC-ip siulersuisuunerisa Danskit naalakkersuisui piumaffigaat Thulemi Inughuarnut ajortuliatik aaqqeqqullugit. -1953-imi amerikkarmiut mittarfiliornialermata Inughuit tamaani najugaqartut pinngitsaalisaallutik nuutsitaaapput, Aqqaluk Lynge, ICC-Greenlandimi siulittaasoq oqarpoq nangillunilu:- Inughuit itsarsuaaniilli piniarfitoqqatik angerlarsimaffitsillu annaavaat, danskillu naalakkersuisuisa akuerisimanngilaat Inughuit nunatoqqaminnut angerlarsinnaanerat.

 

ICC-ip siulersuisuunerisa aningaasarsiornikkut ineriartorneq niuernikkullu aporfiit eqqartorpaattaaq, soorlu aamma oqaatsitigut attaveqaqatigiinnikkullu sammisat eqqartorneqartut. Siulersuisuunerit aalajangiusimavaat ICC-Greenland tassaassasoq sulianik taakkuninnga akisussaasussaq ingerlatsisussarlu.

-Naggueqatigiit Inuit inuusaatsiminnik ingerlatsiinnassagunik sammisanut taakkununnga eqeersimaarluinnartariaqarput, piukkunnarsannginnissamut piffissaqanngilagut ingammik nunarsuarmioqatitta inuusaasitsinnut sunniuteqaleraluttuinnarat upalungaarsimafigissagutsigu, Sheila Watt-Cloutier naggasiivoq.

Niuerneq attaveqaqatigiinneq oqaatsillu

Danskit naalagaaffiat iluarsiisariaqarpoq

Sanaalukkanik kulturimillu illersuiniarneq

Nunarsuup kissatsikkiartornera inuit pisinnaatitaaffinnik unioqqutitsineruvoq