English
Dansk
Kalaallisut

E-mail iccgreenland@remove-this.inuit.org
Phone +299 323632 

EU-mi aalajangerneq Inuit kamaatigaat

Inuit Kattuffiata ICC-ip EU sakkortuumik uparuarpaa puisinik inerteqquteqalersitsinerup kingorna.

Kalaallit Nunaani, Canadami, Alaskami aamma Tjukotkami Inuit EU-mi taasineq, EU-p iluani puisinik eqqusseqqusiunnaarnermik kinguneqartoq "eqqarsarluannginnermik tunngaveqartutut" taavaat.

– Sunaluunniit eqqarsarluannginnermik tunngaveqarluni iliuseqarneq assigiinngitsunik inissinneqartarpoq. Tamatumunnga tunngaviusut arlallit EU-mit eqqortinneqarput. Taamatut aalajangernerup kingunerisaanik Inuit sakkortuumik eqqorneqassapput, aalangerneq eqqortumik tunngaveqarluni suliarineqarsimanngilaq, taamaattumillu iluamik eqqarsarluaqqaarnani iliuutsitut taaneqartariaqarluni, Aqqaluk Lynge, ICC Greenlandimi præsidenti oqarpoq.

Aqqaluk Lynge nangilluni oqarpoq, sunik tunuliaqutaasunik aamma taakku kingunerisassaannik misissueqqaarnani aalajangiinerit, ingasaassiniat akornanni pisartut.

– Paasinanngilluinnarpoq uagut allat ileqqorlortutut eqqartuussinnaammatigut.

EU-mi puisit inerteqqutaalerneranut tunngatillugu oqaatsit sakkortuut atorneqarnerat ippassaq aallartippoq, tassa uumasunik illersuiniaqatigiiffiup IFAW-ip Danmark aamma Rumænia ileqqorlortutut taammagit, nunat taakku marluk puisinik inerteqquteqarnissamut akuersinngimmata.

ICC-ip nunani tamalaani siulittaasua Jimmy Stotts, Alaskami Anchoragemiittoq europamiut aalajangernerat iluarinngilluinnarpaa:

– Paasinanngilluinnarpoq Europami Naalagaaffeqatigiit taamatut iliornerat. Issittumi nunat inoqqaavinik aamma Inuit kulturiminnut tunngaviannut toqqaannartumik saassussineruvoq,

Jimmi Scotts isumaqarpoq EU-p issittumi kulturinut malinnaasinnaanera appasissorujussuarmik inissisimasoq.


www.sermitsiaq.gl