English
Dansk
Kalaallisut

E-mail iccgreenland@remove-this.inuit.org
Phone +299 323632 

Kirunami Issittumi Siunnersuisoqatigiinni Ministerit ataatsiminneranni Aqaaluk Lyngep oqalugiaataa 2013

Aqqaluk Lynge, Siulittaasoq, Inuit Issittormiut Siunnersuisoqatigiiffiat
Issittumi Siunnersuisoqatigiit Ministeriisa Arfineq Pingajussaannik ataatsimiinnerat
14.-15. maj 2013, Kiruna, Sweden

Qujanaq siulittaasoq, maani ataqqinartut akornanni oqaaseqatsiarsinnagatta.

Sverigep Naalakkersuisuinut qujassuteqarusuppunga ukiuni kingullerni marlunni Siulittaasoqartitsisimanerat pillugu. Inuit Issittormiut Siunnersuisoqatigiiffiat sinnerlugu Saamit maani tikeraanut ajunngitsumik pinninnerannut aamma qujavunga.

Issittumi Siunnersuisoqatigiit Ministeriisa Arfineq Pingajussaannik ataatsimiinnerat maani Kirunami pisoq nunarsuaq tamakkerlugu silap pissusaata allanngoriartornerata nutaamik killiffeqarnerata nalaani aamma pivoq. Majip 9-ni, USA-mi Immat aamma Silaannarsuaq pillugu Qullersaqarfik nalunaarpoq gassit silaannarmik kissatsisartut aniatitaasut annertussusaat aatsaat taamak annertutigilersimasoq tamannalu ukiuni 3,5 millionini takuneqarsimanngitsutut annertussuseqalersimalluni.

Silap pissusaata allanngoriartornerata kinguneri uatsinnut Issittormiuusunut ulluinnarni inuunitsinnut sunniuteqarput.

Issittumi Naalagaaffiit nunat allat suleqatigalugit Naalagaaffiit Peqatigiit Silap Pissusaata Allanngoriartornera pillugu Sinaakkusiussamik Isumaqatigiissutaat atorlugu iliuuseqarniarlutik piumassuseqarnerat tikilluaqquarput taamaaliornikkut kingusinnerpaamik 2015-miit aallartittumik nunarsuup agguaqatigiissillugu kissassusaata qaffakkiartuinnarnera annikillisinniarlugu inatsisitigut pituttuisumik isumaqatigiissuteqarnissaq naammassiniarlugu.

Siulittaasoq, Inuit Issittormiut Siunnersuisoqatigiiffianit maluginiarparput Kirunami Nalunaarummi Nunat Inoqqaavisa qangaaniit inooriaasiat, kulturiat, ineriartornernut nutaanut naleqqussallaqqissuunerat, aningaasarsiornikkut aamma peqqissutsikkut pingaartitsinerat akuersorneqartumik ilanngunneqarsimasoq. Nalunaarutikkoortumik Issittumi Atorfikkaat Nunat Inoqqaavisa inooriaatsiminni pingaartitaat takussaasumik tapersersorneqartumillu qanoq iliuuseqarfiginissaannik sakkussanillu atorsinnaasunik inassuteqaasiornissaannik kaammattuinerat tamakkiissumik isumaqatigaarput – suliniutigeqqusaasullu pineqartut pillugit nalunaarusiamik tullissaanik Ministerit Ataatsimiinnissaanni 2015-mi saqqummiusseqqusineq ilanngullugu.

Issittumi Naalagaaffiit aamma Nunat Inoqqaavisa sammisarpassuit assigiinngitsut pillugit ataqatigiissaakkamik iliuuseqarfigalugit suleqatigiinnerat Issittormiunuinnaanngitsoq aamma nunarsuup sinneranut sunniuteqarpoq, tamannami Siunnersuisoqatigiit pingaaruteqassusaannik naqissusiineruvoq (testamentiuvoq).

Sammineqartut allat tassaapput Issittumi mingutsitsinerup annikillisarneqarnissaannut tunngasut, taakkununnga ilaavoq Kviksølv pillugu Isumaqatigiissut nutaaq. Issittumi immap seernarsiartornera pillugu ilisimatusarnerit pingaarutillit, qanittukkullu Immami uuliaarluertoqarsinnaaneranut piareersimaneq aamma Iliuuseqarnissamik Isumaqatigiissut naammassineqaqqammersoq, Issittumi Immakkut Umiarsuit Angallannerat pillugu Naliliineq allanngoriartornerit misigineqartut pillugit ingerlaavartumik Inuit misigisaat takussutissiorneqarnerannut tunngatillugu suliaq; oqaatsit pillugit suliuniut aamma allat Kirunami Nalunaarummi iliuuseqarfiginiarlugit nalunaarutigineqartut.

Siulittaasoq, Inuit Issittormiut Siunnersuisoqatigiiffiata USA-p Nunarsuup Immikkoortua Issittoq pillugu Periusissiamini nutaami, Alaskami Nunat Inoqqaavisa isumasiorneqartarnissaannik ataqatigiissaareqatigisarnissaannillu najoqqutassatut periuseriniarneqartut pillugit immikkut oqariartuuteqarsimanera maluginiarpaa. USA-p tamatuminnga ineriartortitsiniarnera tikilluaqquarput piviusunngortinnissaatalu takunissaa qilanaaralutigu.

Siulittaasoq, Danskit Nunanut Allanut Ministeriata Kalaallit Nunaata Issittumi Siunnersuisoqatigiit sulinerannut inissisimanera pillugu oqaaserisai ICC-mit tapersersorneqarput. Qamannga pisumik Ataavartumik Peqataasut sinniisui qutsavigaakkattaaq aamma ICC-mit maaniittut peqatikka, James Stotts, Alaska, Duane Smith, Canada Inuit sinnerlugit ilungersortumik suliaannut aamma Carl Christian Olsen, Kalaallit Nunaat, Issittumi Siunnersuisoqatigiit Nunat Inoqqaavisa Allattoqarfianni siulersuisuni suleqataaneranut.

Ukiunilu tulliuttuni marlunni Canadap Siulittaasoqartitsinissaanut suleqataanissatsinnut qilanaarpugut Ataqqinartoq Leona Aglukkaq siuuttoralugu. Naggueqatigiinnut Inunnut ilaanerit aamma Avannaarsuani inunnut allanut attuumassuteqartuunerit tunngavigalugu qularutiginngilarput nunavit angorusullugit kissaataanik naammassisaqarfiusumik takutitsiumaartutit.

Qujanaq.