English
Dansk
Kalaallisut

E-mail iccgreenland@remove-this.inuit.org
Phone +299 323632 

ICC-p siulittaasuata oqaaseqaataa

Inuit Ataqatigiit Ataatsimeersuarnerat

Siunissarput - Akisussaaffipput

Sisimiut 25.1.2013

 

Naggueqatigiit Inuit kattuffiat ICC sinnerlugu qujavunga Inuit Ataqatigiit Kattuffiata ataatsimeersuarneranut qaaqqusaaninnut aamma Ataatsimeersuarnerup ammarnerani oqaaseqatsiarsinnaanera qujassutigaara.

Uannut tulluusimaarnaqaaq maani oqaluttarfimmiit oqaatsikka ima aallaqqaasersinnaagakkit:

Ataqqinartoq Naalakkersuisut siulittaasuat aamma Inuit Ataqatigiit siulittaasuat Kuupik V. Kleist Asasakka Inuit Ataqatigiit, ataatsimeersuarnermilu najuuttusi tamassi.

Akornassinneeqqilluni nuanneqaaq.

ICC-miunit inuulluaqqutissavassi. kissaallusi ataatsimeersuarluarumaartusi. Qujanarlu naggueqatigiit Inuit suleqatigiinnerat tapersersortuarassiuk peqataaffigalugulu.

Partiitut Nunatsinni naalakkersuinermi siuttuusutut siunissarput pillugu akisussaffimmik oqimaattumik nammataqarpusi. Ataatsimeersuarnermimi aalajangersakkasi pingaartumik isumalluutinik uumaatsunik iluaquteqarnissamut tunngasut, nunarsuarmioqatitsinnut tamanut kinguneqartussaapput aammalu naggueqatigiit Inuit inuunerannut mikinngitsumik sunniuteqartussaallutik.

Ukiuni kingullerni marlunni Nunatsinnili aatsitassarsiornermut oqartussaaffiup tamakkiisup tiguneqarnerata kingorna, Inuit Issittormiut Siunnersuisoqatigiivinut Nunatsinni suliassat annertuserujusuarsimapput. Tassami FN-imi ilaasortaanerput peqqutigalugu immikkut inissisimavugut apeqqutini pingaaruteqartuni pisortanit tusarniaavigineqartuartaratta. Maannali Nunatsinni pisunut immikkut ilisimasalittut tusarniaaffigineqartarnerput aatsaat ilusinikkiartuaarpoq.

Aatsaat piginnaanngorsarneq aallarteruttorpoq. Suliassat imaannaanngitsut saatsinniipput. Akisussaaffik annertoqaaq. Inuiattut tunngavitta aammalu soqutigisatta erseqqissartuarnissai pinngitsoorneqarsinnaanngilaq.

Qujanartumilli ICC toqqammavigissaarpoq sulinissatsinni najoqqutarigatsigu 2011-imi aalajangersagaq Inuit Nunaanni aatsitassasiornermi toqqammavigisassat aalajangersakkat tikkuussisuusut periusissanik. Taakku aalajangersakkat oqallinnermi najoqqutaasinnaalluartut ilissinnut tamanut agguaanneqassapput.

Nunatsinni naalakkersuinikkut allannguutaasimasuni pingaarnerpaaq tassa, Inuiattut akuerineqarnerput, Inuit Ataqatigiit anguniagaanni sallerpaajuartoq maanna angusimaligarput - qanorpiaq isumalimmik kalaallinut inuiannut tunniarnersoq aamma paaserusunnarsivoq.

Taamaattumik innuttaasuni erseqqissumik oqallisigineqarnissaa kissaatiginarpoq. Inuiaassutsimik akuerisaaneq avammut tunngasuinnaanngilaq, Nunatsinniuna nammineq akornatsinni aamma akueriniagassarput. Pisortatigut ingerlatsinermi ilinniarfinni suliffeqarfinnilumi suli takussaapput inuttut kinaassutsitsinnik akuersaanngitsut akerliunerluunniit najoqqutaralugit ingerlatsisut.

Aamma Nunamik piginnittuuneq pillugu sorsugassaqaqaagut. Tamatuma akornatsinni sukumiisumik oqaluuserinissaa aamma pingaartuuvoq, tassami partiip Nunatsinni naalakkersuisuusup pisussaaffigaa Nunatsinnik piginnittuunermik oqartarnerput qanorpiaq paasineqarnissaa inuiannut erseqqissassallugu.

Maannami maani iluanaarutissaminnik soqutigisallit nunatta ilaanik atugassinneqartarnerat piginnittuusut pisinnaatitaaffiinik kalluaasussaavoq. Pinngitsoorani ulluinnarni inuunitsinni malugisassaasunik. Taamaattumik ICC maanna nunamik atuinerput pillugu misissuisitsilluni aallartissimavoq. Misissuinerullu kingunerisussaavaa Naalakkersuisunut inassuteqarnissaq.

Aammattaaq immikkut inatsisitigut ilisimasalinnit, FN-imi Nunat Inoqqaavisa Pisinnaatitaaffii pillugit aalajangersakkat sorpiaat Nunatsinni atuuttariaqarnerannik innersuussuteqartussaq, maanna misissuineq aallartittussanngorpoq. ICC-p pisinnaatitaaffivut pillugit paasisitsiniaanini ukiarmi aallartitani ukioq manna ingerlateqqissavaa pisinnaatitaaffivummi ilisimanngikkutsigit immitsinnut aaginnartussaavugut. Taamatut suliaqarnerup siunertaraa kalaallit inuiaat pisinnaatitaaffimminnik ilisimasaqarnerunissaat, minnerunngitsumillu pisortavut aamma qinikkavut tamavimmik piumasaqarfigineqartariaqarput tunngaviusumik inuiattut pisinnaatitaaffitsinnik ilisimasaqarnissaat.

Naggataatigut imatut oqassaanga: Nunarsuup sinnerani nunat inoqqaavisa naalaarpaasi. Eqqarsaatigisiuk Nunatta naalakkersuinikkut qanoq inissikkiartornera ilissi aalajangersaaqaataaffigissagassiuk Nunarsuup sinneranut sunniuttussamik. Taamaattumik inuiattut kinaassuserput tunngavigalugu akisussaaffik tamanna aquttariaqarpoq.

Kissaappassi ataatsimeersuarluarnissassinnik.

 

Aqqaluk Lynge