English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Inuit Issittormiut Siunnersuisoqatigiiffiata Kalaallit Nunaata arfanniarnermut politikia tamakkiisumik tapersersorpaat

ICC-mi siulersuisut januar 2013-mi Nuummi ataatsimiinneranni ilaatigut arfanniarnermut tunngassuteqartut eqqartorpaat.

ICC ukiorpanni Arfanniarnermut Ataatsimiitsitaliarsuarmi IWC-mi alaatsinaatsutut ilaasortaavoq ukiunilu kingullerni aningaasatigut atugassarititaasut killeqarneri pissutigalugit toqqaannartumik peqataasarsimanngikkaluarluni malinnaajuartuuvoq pisariaqartillugulu akuliuttarluni.

2013-mullu Kalaallit Nunaata IWC-mit akuerineqartumik arfattassinneqanngitsoornerata kingunerisaanik Kalaallit Nunaanni Naalakkersuisut aalajangerput Kalaallit Nunaat imminut arfattassissasoq siusinnerusukkut Kalaallit Nunaat sinnerlugu piumasaqaataasartut uppernarsaataasartullu saqqummiunneqartartut tunngavigalugit.

"ICC-mi siulersuisut Kalaallit Nunaata nunap inoqqaavisut arfanniartarnerat tamakkiisumik tapersersugaraat inuiaqatigiillu neqissaqarniarnikkut pisariaqartitaat taamaaliornikkut qulakkeerneqartarnera tapersersorlugu", ICC-mi siulittaasoq Aqqaluk Lynge oqarpoq nangillunilu:

"Ilisimatuussutsikkut uppernarsarneqartumik Kalaallit Nunaata piujuartitsinermik tunngaveqarluni aamma nunat tamalaat akornanni mianersornissamik tunngaveqartumik IWC-mit manna tikillugu akuersaarneqannginnera pissusissamisuunngilaq, taamaatumik Naalakkersuisut 2013-mut atuuttunik Kalaallit Nunaannut arfattassiinissamik aalajangernerat ICC-mi siulersuisunit tamakkiisumik tapersersorparput", Aqqaluk Lynge naggasiillunilu oqarluni:

"ICC-mi nunap inoqqaavisa pisinnaatitaaffiinik tapersersuilluta sulissuteqarlutalu nunat tamalaat akornanni ilungersortuarpugut kalaallillu neqissaqarniarnikkut arfattassinneqartuarnissaat IWC-ip suliassaraa pisussaaffini, maleruagassat nunallu tamalaat akornanni isumaqatigiissutaasut naapertorlugit. Ajuusaarnartumilli ukiuni kingullerni IWC-mi naalagaaffiit ilaasortaasut amerlanerusut uumasunik illersuiniaqatigiinnit assigisaannillu eqqunngitsunik paasissutissanik siaruarteriffigineqarlutik tusaaniarneqartuarnerat ajornartorsiutaaleraluttuinnarpoq, taamatullu ingerlaaseqaleriartorneq ernumanartuuvoq eqqumaffigeqqissaarneqartuartariaqartoq."

Paasissutissat tunulequtaasut matumunnga ilanngunneqarput.

  • PDF-itut <media 460 - - "TEXT, IWC supportletter grl da eng final, IWC_supportletter_grl_da_eng_final.pdf, 132 KB">aajuk</media> (132 KB)

Annertunerusumik paasisaqarusukkuit attavissaq: Aqqaluk Lynge, 323632, ICC-mi siulittaasoq