English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Uuliasiornissamut inassuteqaatit

Tusagassiorfinnut nalunaarut, Nuuk aprilip 15-anni 2013

Upernassaq 2012-imi (ICC) Inuit Issittormiut Siunnersuisoqatigiiffiata suleqatini Oceans North Canada peqatigalugit Cairn PLC (Cairn)-ip 2011-imi Kitaani misiliilluni uuliamik ujarlerluni immap naqqani qillerinera arlaannaannulluunniit attuumassuteqanngitsumit misissortissimavaat. Inaarutaasumik nalunaarut "Project Review: Cairn Energy’s 2011 Offshore Drilling in West Greenland" maanna uani takuneqarsinnaanngorpoq www.inuit.org.

Nalunaarusiaq ippassaq ullaakkut manna Inuussutissarsiornermut Aatsitassarsiornermullu Naalakkersuisortaamut Jens-Erik Kirkegaard-imut ICCp siulittaasuata Aqqaluk Lyngep ataatsimeeqatigiinnermi tunniuppaa. Nalunaarusiami paasissutissat ICC-p Aatsitassanut Ikummatissanullu Pisortaqarfimmiit qinnutigineqarsimasut sukumiisumik nalilersorneqarput.

Pitsanngorsaaviusariaqartut annertunerit:

Piffissaq eqqorlugu paasissutissiineq: Ukiut marluk sinnerlugit matuma siornatigut uuliasiorneq pillugu paasissutissanik pissarsiniarneq, ukiumik ilivitsungajammik sivisussuseqarsimavoq. Misiliineq manna unammilligassamik qulaajaavoq: Qanoq innuttaasut piffissaq eqqorlugu suliniutit sioqqullugit aallartereernerinilu paasissutissinneqassappat, suliniutit qaangiutereersut pillugit paasisaqarniarneq taamak sivisutigippat?

Innuttaasut pisinnaatitaaffigaat kiffaanngissuseqartumik, sioqqutsisumik aamma paasinnittumik akuersisinnaatitaaneq. Piffissaq eqqorlugu paasissutissinneqarnissaq tamakkiisumik akuerineqartariaqarpoq, innuttaasullu paasissutissanik pissarsisinnaatitaanerat sapinngisaq tamaat atorlugu illersoneqartariaqarpoq.

Takussutissat amigaataasut: Ajoraluartumik sinerissap avataani qillerinermi upalungaarsimaneq pillugu paasissutissat pingaarnerit misissuisitatsinnut tunniunneqanngillat, tamannalu nassuiarneqarani.

Aatsitassanut Ikummatissanullu Pisortaqarfiup nakkutilliinerminni misissuinerminnilu nalunaarsuinerat periusaallu pitsanngorsaavigineqarsinnaasut annersaasa ilagaat. Innuttaasut sukumiisumik paasissutissinneqarnikkut, isumaqatigiisutaasunik eqquutsitsiniartoqarnerata tatiginartumik ingerlanneqarnera malinnaavigisinnaasariaqarpaat.

Allakkiat titartornikut: Paasissutissat ilaat ima titartorneqarsimatigipput, immikkoortut atorsinnaassanatik. Patsisigineqartoq tassaavoq paasissutissat unammillertsinut takoqqusaannginnerat.

Paasissutissanik isertuussineq taamaallaat immikkut peqqutilimmik pisassaaq, tamatigut atuuttuunani. Paasissutissanik saqqummiussinnginneq tunngavissaqarluartariaqarpoq, erseqqissunillu maleruagassaqartariaqarluni. Unammillertinut takutitsinaveersaartoqaraluarpalluunniit upalungaarsimaneq attuumassuteqanngitsunit nakkutigineqarsinnaasariaqarpoq.

Nalunaarusiat inaarsakkat: Paasissutissat ilaat tunniunneqarsinnaasimanngillat, suliffiup iluani allakkiaanerat patsisigineqarluni, nalunaarusiornissallu pilersaarutaannginnera kingusinaarsimaneraluunniit peqqutigineqartarluni.

Aatsitassanut Ikummatissanullu Pisortaqarfimmut inassutigineqarpoq sukumiisumik tamanut ammasumik, Cairn-ip 2011-mi misissuinissamut pilersaarutaanik akuersinermi piumasaqaatit atuutsinneqarnerinik misissuilluni, misilittakkanik qulaajaalluni siunissamilu qillerisoqassappat inassuteqaatinik tikkuaasumik nalunaarusiussasoq.

Misissuineq tamatumalu inerniliinerata ICC-mut qularnarsisippaa ilumut Aatsitassanut Ikummatissanullu Pisortaqarfiup 2011-mi uuliasiorluni qillerinerup sutigut tamatigut issittumi sinerissaq avataani maleruagassanik, nunat tamat akornanni atuuttunik, ilumut atuutsitsisinnaasimaneq naqissusersinnaaneraa.

ICC-miit neriuutigineqarpoq misiliinerup nalunaarusiallu matumap avatangiisinut kingunissanik naliliinerup attuumassuteqanngitunut ammaanneqarnissaata pisariaqartinneqarneranik takutitsisoq, neriuutigineqarportaaq nalunaarusiap Aatsitassanut Ikummatissanullu Pisortaqarfimmiit Naalakkersuisuniillu siunissami sinerissap avataani misissuinissat sioqqullugit avatangiisit pillugit upalungaarsimanerit periutsillu nukittorsarneqassasut.