English
Dansk
Kalaallisut

E-mail iccgreenland@remove-this.inuit.org
Phone +299 323632 

WWF aamma ICC: London Mining-ip nunatsinni saviminissamik piiaaffiliorniarnera ernumanarpoq

Oktobarip 19-anni 2012

WWF Verdensnaturfonden aamma ICC Inuit Issittormiut Siunnersuisoqatigiiffiat siullermeerlutik London Mining-ip Nuup Kangerluani saviminissamik piiaaffiliorniarnera pillugu tusarniaanermut akissummik ataatsimoorussamik nalunaaruteqaqqammerput. Suliniut suleqatigiiffinni taakkunani, pinngortitaq uumasullu eriagineqanngippallaarnerat pillugu, ernumatitsivoq.

Isuani London Mining-ip suliniutaa, piiaanissamut akuersissuteqarfigineqassappat, Nuup Kangerluata qinnguani pissaaq. Ullumikkut tassaavoq tusarniaanermut akissuteqarnissamut periarfissaq kingulleq.

"Erngup nukinganik isumalluuteqarnani London Mining-ip Namminersorlutillu Oqartussat saviminissamik piianermik, nukissamik atuingaatsiartussamik, pilersaaruteqarnerat ajornartorsiutitut isigaarput. Akerlianik aatsitassarsiorfiliorniarneq ikummatissamik nunatta CO2 –mik aniatitsineranik annertusaasussamik atuiniarpoq. Silap pissusaata allanngornera, maannakkorpiaq pisoq, issittumilu pinngortitamik inunnillu eqquingaatsiartussaq, eqqarsaatigalugu siumut isiginerunngilaq", ICC-mi siulittaasoq Aqqaluk Lynge, oqarpoq.

WWF-ip ICC-llu inassutigaat London Mining-ip suliniutaani erngup nukingata atorneqarsinnaanera sukumiisumik misissorneqartariaqartoq. Erngup nukinganik atuisinnaaneq periarfissaasutut nalilerneqassappat, tamatuma atorneqarnissaa piumasaqaataasariaqarpoq.

Ernumanartutut allatut isigineqartoq tassaavoq aatsitassarsiorfiup eqqaani tuttoqassuseq. "Tuttoqatigiit ernummatigaavut. Suliniummit innarlerneqarnissaat pinngitsoorneqarsinnaanngilaq. Taamaammat, suliniutip aallarnisarneqarnerani, kingornali aamma ingerlatsinerup nalaani, uumasoqatigiit qanoq sunnerneqarnissaat malinnaaffiginiarlugit, nalunaarsuinissamut pilersaarummik piorsaasoqartariaqarpoq. Taamaasilluni kingunipilutsitsinermik malunnartoqassappat qisuariapallassinnaaniassaagut", Gitte Seeberg, WWF Verdensnaturfonden-imi allattaaneq, oqarpoq.

Aammattaaq ajuusaarnarpoq London Mining-ip umiarsuarnut, aatsitassarsiorfimmut tassanngaaniillu assartuisussanut, orsussaq kimittooq oqitsuunngitsoq atorniarmassuk. Orsussaq kimittooq mingutsitsineruvoq pinngortitamilu arrortikkumaataarnerulluni. Issittup pinngortitaanut innarleruminartumut ingalluni ajoqutaalissaaq. (orsussaq kimittooq=svær fyringsolie, orsussaq oqitsoq=let fyringsolie)

"Allanik periarfissaqartillugu mingutsitsinerusup atorniarneqarnera ajuusaarnarpoq, avatangiisinut innarliinnginnerusunik periarfissaqartillugu. Suliami taamak annertutigisumi qinikkat suliffeqarfillu avatangiisinik innarliinaveersaannginnerat pakatsinarpoq, uffa periarfissaagaluartoq", Gitte Seeberg oqarpoq.

Suliniaqatigiiffiit taakku aamma tikkuarpaat ilaatigut imarsiornermut imikoorfinnillu saliinissamut piumasaqaatit sukanganerusariaqartut, akuutissanik uuliamillu maqisoornissamik pinaveersaartitsinermut aaliangersakkanik peqartariaqartoq. Ajutoortoqasagaluarpat ajutoornerup kingunissai annikinnerpaamiitinniarlugit upalungaarsimanerit aaliangersimaqqissaartariaqarput.

"Nuup Kangerluani akuutissanik uuliamilluunniit maqisoornissaq ajorluinnassaaq pinngortitamullu imungarsuaq kinguneqassalluni. Inuppassuit uumasorpassuillu sunnerneqarsinnaapput. Nuup Kangerlua siornatigut umiarsuarnik Isuani suliniummi atorniarneqartutuulli angitigisunik angallavigineqarnikuunngilaq umiarsuillu taamak angitigisut siornatigut Nuup Kangerluata qinnguaniinnikuunnatik", Aqqaluk Lynge oqarpoq nangillunilu:

"Nutaanerpaamik kangerluup naqqata uuttortarneqarneranik peqartariaqarpoq, immallu assingi atorsinnaasut umiarsuit Isuani suliniummut pajuttulersinnagit pissarsiassaasariaqarlutik. Pinngortitarput avatangiiserpullu pitsaanerpaamik illersortariaqarpagut. Suliniut manna Kalaallit Nunaanni suliffeqarferujussuarnut allanut aqqutisiuisuussaaq. Neriuppunga tusarniaanermut akissutitsinni, Aatsitassanut Pisortaqarfimmut nassiuteqqammisatsinni, inassuteqaatigut qimerloorluarneqarumaartut".

WWF-ip ICC-llu suleqatigiinnerat pillugu

WWF Verdensnaturfonden aamma ICC Inuit Issittormiut Siunnersuisoqatigiiffiat qaammat kingulleq, suliffeqarferujussuit inerisarnerini, innuttaasut peqataatinneqarnerunissaat pillugu suleqatigiillutik suliniutertik saqqummiuppaat. Suliniutip siunertaraa innuttaasut suliniaqatigiiffiillu nunatsinni suliffissuit nutaat pillugit oqallinnermi peqataasinnaanerat nukittorsassallugu. Mannalu tassaavoq London Mining-ip Isuani suliniutaa pillugu tusarniaanermut ataatsimoorlutik akissuteqaataat siulleq, Aatsitassanut Pisotaqarfimmut Nuummiittumut oktoberip 19-ani 2012 nassiunneqarsimasoq, ullorlu taanna akissuteqarnissamut periarfissaavoq kingulleq.

Ukiuni makkunani Kalaallit Nunaata aatsitassaataasa soqutigineqarnerat annertusigaluttuinnarpoq. Namminersorlutik Oqartussat ukiuni aggersuni suliffissuit qassit piviusunngussanersut avatangiisinullu sunniutissat qanoq piumasaqaateqarfigineqassanersut aaliangiiffigisussanngorpaat. ICC-p WWF-ilu Kalaallit Nunaanni suliffissuaqarnikkut aningaasarsiornikkullu ineriartortariaqarneq paasilluarpaat, pinngortitamulli uumassusilinnullu suliffissualiornerup kingunerisinnaasaat ernumassutigaat. Suliffissuaqarnikkut ineriartornerup aamma inuuniarnerup avatangiisillu mianersuunneqarnissaasa oqimaaqatigiissinneqarnissaat, suliniaqatigiiffiit taakku marluk assoroorutigaat.

Suliniut Villum-ip aningaasaateqarfianit aningaasaliiffigineqarpoq.

Tusagassiutinit Gitte Seeberg attavigineqarfissaa:
Kommunikationschef Charlotte Brix Andersen, tfl. 3172 8560, e-mail: c.brix@remove-this.wwf.dk

Tusagassiutinit Aqqaluk Lyngep attavigineqarfissaa:
Tlf. 323632