English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

AQQALUK LYNGE 65-ILIIVOQ

Inuit Issittormiut Siunnersuisoqatigiiffianni, ICC-mi siulittaasoq Aqqaluk Lynge ukiut 65-it matuma siorna Aasianni inunngortoq ullumi Nuummi oktoberip 12-anni inuuissiorpoq.

Inuusuttuullunilli Aqqaluk Lynge Nunatsinni politikikkut oqallinnermi saqqumilaartunngorpoq Nunatsinni pissutsit atuuttut siunissaarlu pillugit oqaaseqartarnermigut ilisimaneqarlualerluni.

60-ikkut naalernerana 70-ikkullu aallartinneranni Danmarkimi ilinniartuunermi nalaani kalaallit ilinniagaqartut peqatigiiffianni Unge Grønlænderes Rådimi kingorna Kalaallit Inuusutut Ataqatigiinnik ateqalersumi siulittaasuusimavoq Nunatsinni ilinniarfeqalernissaq soorsuutigalugu. 1976-imi ilinniareerluni Nunatsinnut uternermini Aasivik aallartimmat ukiut arlallit siuttuuffigaa. 1978-imi Inuit Ataqatigiit partiitut pilersinneqarnernat sallersaavoq ukiorpaalunnilu siulitaasuuffigalugu. 1983-imi Inatsisartunut qingaaqqaarpoq Naalakkersuisunilu ilaasortaasimalluni.

Aqqaluk Lynge ICC Nuummi pisortatigoortumik 1980-imi pilersinneqaqqaarmat siulersuisuinut qinagaavoq maannamut atuulluni. Præsidentiusarp oq 2014-illu tungaanut Naggueqatigiit kattuffiat siulittaasuuffigaa. FN-imi Nunat Inoqqaavisa Ataatsimiittartoqatigiivini siulitaasumut tulliusimavoq. Aqqaluup nagueqatigiit Inuit kiisalu Nunat Inoqqaavisa pisinnaatitaaffii pillugit sorsuttuartuuvoq aammalu taalliortutut atuakkiortutullu tamatigut inuiaqatigiinni inuttut ataqqinassuseqartumik atugaqarnissaq qitiutittuarpaa. Allamiut oqaasi atorlugittaaq saqqumiisarnermigut Nunatta avataani annertuumik ilisimaneqarpoq.

Aasaq junimi Aqqaluk Lynge Amerikkami universititit nuimasut ilaanni Dartmouth College-imi immikkut ittumik Ataqqinaammik Doktorinngortitaanermini Universititip rektorianit maanna Verdensbankimi siuttuusumit Jim Kim-imit nersorniarneqarami allaat nunarsuarmi tusaamasat allat atii Mahatma Gandhi Martin Luther Kinngillu ilanngullugit eqqaaneqarput. Aqqaluk Lynge qujassuteqarami oqarpoq: "Ataqqiniarnerqarnera taamaattoq tuppalliutigeqaara pingaartumik naggueqatigiit Inuit aammalu Nunat Inoqqaavisa pisinnaatitaaffii pillugit suleqataaninnut nersorniutitut tigugakku."