English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

MIO aammalu ICC meeqqanut kajumissaaripput: Pisinnaatitaaffisi atorluarsigit

Novembarip 23-anni 2012

Meeqqat pisinnaatitaaffii pillugit atuartut atuagassaat soqutiginartoq atuarfinnut nassiussorneqaleruttorpoq

Massakkorpiaq Naalagaaffiit Peqatigiit Meeqqat Pisinnaatitaaffii pillugit Isumaqatigiissutaat pillugu atuartut atuagaannik atuaqatigiikkuutaat atugassaannik nunatsinni atuarfiit tamakkerlutik akeqanngitsumik nassiussorneqaleruttorput, tassungalu ilaassaaq ilinniartitsisumut ilitsersuut, taakkulu marluk tamarmik qulequtaraat "Pisinnaatitaaffeqarpunga!".

MIPI-iusimasoq, maanna MIO-nngorsimasoq kiisalu ICC Kalaallit Nunaat tassaapput suleqatigiinnermikkut atuartut atuagassaannik suliaqartuusimasut. Atuagaq kalaallisut danskisullu allagaavoq atuartunillu akullernik atuartitsinermut naatsorsuusaalluni. Suliaq Ilaqutariinnermut, Kulturimut, Ilageeqarnermut Naligiissitaanermullu Naalakkersuisoqarfimmit aningaasanik tapiiffigineqarsimavoq.

Atuartut atuagaanni siunertaasoq tassaavoq Naalagaaffiit Peqatigiit isumaqatigiissutaat naapertorlugu pisinnaatitaaffimminnik nunatsinni meeqqat ilisimasaqalissasut. Meeqqat pillugit isumaqatigiissut pisinnaatitaaffinnik meeqqanut tunngassuteqarluartunik sammisaqarpoq. Pisinnaatitaaffiit unioqqutinneqannginnissaat qularnaarniarlugu meeqqat inersimasullu taakkuninnga ilisimasaqarnissaat pingaaruteqarpoq.

Atuartut atuagaanni pisinnaatitaaffiit qassiit Meeqqat pisinnaatitaaffii pillugit Isumaqatigiissummi ittut qulequttat arfinillit arlalinnik oqaluttuaarartallit atorlugit sammineqarput. Oqaluttuaaqqat tamarmik apeqqutinik nalornisoornartunik naggaserneqartarput, nalornisoorullu taanna immikkoortumi ataatsimi paasiuminartumik allakkami akineqartarpoq assersuummullu naleqquttumik pisinnaatitaaffinnik nassuiaaffiusarluni. Oqaluttuaaqqat tamarmik atuartunit akullernit titartagartalersugaapput.

Ilinniartitsisumut ilitsersuutikkut atuartut pisinnaatitaaffimminnik qanoq ilinniartinneqarsinnaanersut ilinniartitsisumut najoqqutassiortoqarpoq. Ilitsersuut ilaatigut suliassanik apeqqutinillu oqallisigisassanik siunnersuutitaqarpoq. Tamatuma saniatigut Meeqqat pisinnaatitaaffii pillugit Isumaqatigiissut tamarmiusoq aammalu naalisarnera ilitsersuummi ilinniartitsisup atuarsinnaavai. Aamma MIO massakkut suliassatut siunnersuutinik qassiinik suliaqarpoq nittartakkami www.mio.gl –mi saqqummersinneqartussanik.

Atuakkap qanoq pinngornera?

Inuit Issittormiut Siunnersuisoqatigiiffiata (ICC) Kalaallit Nunaanni immikkoortortaa aammalu Meeqqat Inuusuttullu Pillugit Ilisimasaqarfik (MIPI) qulequttamik pineqartumik tamarmik suliaqarnertik aallaavigalugu aalajangersimapput meeqqat pisinnaatitaaffii pillugit atuartitsisunik suliaqarniarlutik. 2010-mi Nuummiit nalunaarummi ilaatigut oqaatigineqarpoq ICC-imi ataatsimeersuartut:

"ICC peqquaat naalagaaffiit Issittumut atasut sakkortuumik kaammattoqqullugit NP Meeqqat Pisinnaatitaaffii pillugit Isumaqatigiissutaata piginnaatitsissutai tamakkiisumik atulerseqqullugit"

Tamanna pillugu 2010-mi ukiakkut ICC Kalaallit Nunaat aammalu MIPI suleqatigiinnissaminnik isumaqatigiissusiorput, taamanilu Isumaginninnermut Naalakkersuisoqarfiusoq suliap naammassineqarnissaanut aningaasanik tapiissuteqarpoq.

Pilersaarusiornerup nalaani aalajangerneqarpoq atuakkap titartagartai tamarmik atuartunit akullernit suliarineqassasut. Taamaammat 2011-imi ukiakkut meeqqat atuarfinnut tamanut allagartarsuarnik allakkanillu nassitsinikkut atuartut ICC Kalaallit Nunaannit MIPI-millu qinnuigineqarput titartakkanik tunniusseqqullugit. Nunatsinnit tamarmit atuaqatigiit kajumissaarut malissimavaat titartakkanillu nuannerluinnartunik nassiussuisimallutik – imalu nassiussat amerlatigisimapput tamakkerlugit atorneqarsinnaasimanatik. Atuartut titartakkanik atuakkami tamakkiisumik ilaannakortumilluunniit atorneqarsimasunik titartaasimasut nersorneqarput.

Suliap ingerlanerani inuit assigiinngitsorpassuit peqataasimapput. MIPI-mi ICC-ilu suliamik ingerlatsisuusimasut allami suliffeqalermata atuakkamik suliaqartut nutaat takkussimapput. Taamaammat Mirian Rønnep Avijâja Absalonsenip MIPI-mi suliarisimasai 2010-imi ukiakkut nangippai, Parnuna Egedellu ICC-imi Sara Olsvigip suliarisimasai 2011-imi nangissimallugit. Tamatuma saniatigut inatsisileritooq, psykologi, suliamik ingerlatsisut kiisalu ilinniartitsisut atuartullu suliamut peqataasimapput, aammattaaq Inerisaavik paasissutissanik ingerlatseqqinnikkut siammarterinikkullu tapersersuisimavoq.

Atuakkap suliarineqarnerata nalaani MIPI ilisimasanik katersuiffittut atorunnaarluni Meeqqat Inuusuttullu Oqaloqatiginnittarfiannut (MIO) pilersinneqaqqammersumut ilanngunneqarpoq. Taamaammallu Kalaallit Nunaanni Meeqqat Illersuisuat siulleq Aaja Chemnitz Larsen ICC-ip Siulittaasua Aqqaluk Lynge peqatigalugu siuleqummik oqaaseqaasiorpoq.

Atuakkap oqaasertalersornera ilusilersorneralu 2012-ip aasaani naammassineqarput. Atuakkat maanna naqinneqarsimalerput nunatsinnilu tamarmi illoqarfinnut nunaqarfinnullu tamanut nassiussuunneqaleruttorlutik. Aammattaaq atuagaq naleqqussarlugu aammalu tuluttuunngortillugu russisuunngortillugulu suliarineqassanersoq taamalu Canadami, Alaskami Chukotkamilu Inuit meerartaannut iluaqutissianngortinneqassanersoq massakkut isumaliutigineqarpoq.

Aallaqqaasiutip ilaani Aqqaluk Lynge aammalu Aaja Chemnitz Larsen meeqqanut ima oqariartuuteqarput:

"Pisinnaatitaaffisi atorluarsigit! (…) Taamaammat kajumissaarusuppassi pisinnaatitaaffisi ilisimaarineruleqqullugit, siunissap qaamanerulernissaa anguniarlugu."

 

Annertunerusumik paasiniaaffissaq:
ICC Kalaallit Nunaat: Parnuna Egede, parnuna@remove-this.inuit.org
MIO: Helle Hammeken-Holm, helle@remove-this.mio.gl