English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Aqqaluk Lynge, ataqqinaammik doktor

Juunip 7-anni, 2012: ICC-ip tusagassiorfinnut nalunaarutaa

Aqqaluk Lynge, kalaaleq Inuit Issittormiut Siunnersuisoqatigiiffianni siulittaasuusoq Amerikami naalagaaffiit ilaanni New Hampshiremi universititimi tusaamasaasumi Dartmouth Collegemi pisortatigoortumik ataqqinaammik doktorinngortinneqarpoq. Taaguut ataqqinartoq Dartmouth Collegep pisortaanit Jim Yong Kimmimit universititip nalliuttorsiornersuani sapaat 10. juni ingerlanneqartumi tunniunneqarpoq.

Dartmouth College 1769-imi aallarnerneqarami aallaqqaammut eqqilinnik inuusuttunik ilinniartitsivissatut, tassa ajoqersuiartortussanik ilinniartitsivissatut, eqqarsaataaqqaarsimavoq. Ullumikkut Dartmouth College USA-mi universititit tusaamaneqarnerpaat arfineq-pingasut Ivy Leaguemik taaneqartartut akornanniippoq. Universititi aammattaaq ullumikkut issittumi ilisimatusarnermik ingerlataqarlualersimavoq USA-milu issittumut ilinniarfissanit pitsaanerpaat akornanniilersimalluni.

Dartmouth Collegep pisortaa Jim Yong Kim amerikamiuvoq koreamiunik nagguilik. Jim Yong Kim nakorsatut inuiaqatigiillu pissusaannik ilinniarsimavoq, taavalu Silarsuarmi Peqqinnissaq pillugu Suliniaqatigiiffissuarmi sakiallunnermut akiuiniarnini pillugu ilisimaneqarluarluni. Jim Kim Silarsuarmioqatigiit Aningaaserivianni aqutsisutut aprilimi toqqarneqarpoq.

Aqqaluk Lynge 2006-imili Dartmouth Collegemut qanittumik attaveqartuarsimavoq universititillu issittumi avatangiisinut politikkeqalernissaanut ilisimaneqarlualersimasumut peqataasimalluni. Aammattaaq Ilisimatusarfiup Dartmouth Collegellu akornanni ilinniartunik paarlaasseqatigiittarnissaq Aqqaluup aallarneeqataaffigisimavaa. 2008-imi Aqqaluk Lynge misissuisutut universititimut attuumassuteqalersimavoq, taamanerniillu universititimi suliniutinut ataatsimeersuarnernullu qassiinut peqataasimalluni.

Nersugaalluartumik ataqqinaammik doktorinngortitsineq Aqqaluup nunarsuarmi nunat inoqqaavisa inuttut pisinnaatitaaffii pillugu annertuumik suliaqarsimaneranik aallaaveqarpoq, taamaattorli ICC-imi Inuit pillugit ukiorpassuarni sulisimanera kiisalu nunat tamalaat eqqaamioriillu suleqatigiiffiini soorlui Naalagaaffiit Peqatigiiffinni Ataatsimiittartoqatigiinni Issittumilu Siunnersuisoqatigiinni ilaasortaanera pillugu nersuiniutaalluni. Aammattaaq Aqqaluk Lyngep Kalaallit Nunaanni naalakkersuinikkut suliaqarsimanera universititimit isiginiarneqarsimavoq kiisalu arlaqaleqisunik atuakkiortarnermigut Kalaallit Nunaanni atuagassaqarnermut tunniussaqarsimanera isiginiarneqarsimalluni.

Aqqaluk Lynge kalaallit maannamut marluinnaasut ataqqinaammik doktorinngortinneqarsimasut ilannguffigai, tassalu naalakkersuisut siulittaasuat Jonathan Motzfeldt, 1985-imi University of Alaska Fairbanksimi ataqqinaammik doktorinngortoq, kiisalu professor Robert Petersen, 1992-imi Canadami Montrealimi Université Lavalimi ataqqinaammik doktorinngortinneqartoq.

Ataqqinaammik tunineqarnermini Aqqaluk Lynge qujassuteqarluni oqarpoq: "Ataqqinaat Inuit pisinnaatitaaffiinik nunarsuarmi nunat inoqqaavi ilungersoqatigalugit suliniarninnut paasinninnertut tiguara".