English
Dansk
Kalaallisut

E-mail iccgreenland@remove-this.inuit.org
Phone +299 323632 

ICC Kalaallit Nunaat Ukiortaami oqaaseqaat

Nalunaarut Januarip 6-anni 2012

ICC Kalaallit Nunaannit kattuffiit suleqatitta ilaasortaat nunaqqativullu tamaasa ukiortaami pilluaqquavut, ukiumi qaangiuttumi suleqatigiilluarnitsinnut qujalluta.

ICC Kalaallit Nunaata sulinermini tamani ICC-p immikkoortui allat Chukotkamiittut, Alaskamiittut, Canadamiittullu suleqatigai.

Ukiumi qaangiuttumi aningaasaqarnikkut tamaviaarnartunik atugaqaraluarluta sulinikkut ingerlalluarsimasutut nalilerparput. Naalakkersuisutiguunngitsumik kattuffittut inuttullu pisinnaatitaaffitta nunatsinni naalagaaffeqatigiinnermilu naalakkersuisunit mianerineqarnissaat eqqumaniarfigaarput, annertuumik iluatsittumik. Tassani pingaartipparput akisussaaqataanerup tamanit malitsitaanissaa anguniakkatigut naammassiniagaqarneq qulequtaralugu.

Ukiortaami nunani tamalaani suleqatigisavut peqatigalugit suliassat pissanganartut Issittumullu inuinullu iluaqutaasussat suleqataaffigisussaavavut.

Nunat inoqqaavisa pisinnaatitaaffiisa akuersissutigineqarnerata kingorna kunngeqarfiup Danmarkip pisussaaffigaa iliuusissanik aallartitsinissaq. Tamatumani nunatsinni Danmarkimilu naalakkersuisut pimoorullugu suleqatiginissaat pisariaqarpoq.

Kunngeqarfiup Danmarkip Issittoq pillugu iliuusissamini nunat inoqqaavisa peqatiginissat pingaarluinnartuuvoq, qinikkatut naalakkersuisut saniatigut soqutigisaqaqatigiiffiit peqataasussaanerat erseqqissumik malitassanut ilaammat.

Inuit pisinnaatitaaffiisa atuutsitaanerannik nunatsinni aallaaveqartumik suliniarnermik isumaliutit piviusunngortinniarnissat aallartisartariaqarpoq. Tamatumani akisussaaffiup tamatuma nunatsinni inatsisartunit naalakkersuisunillu piviusunngortitsinniarnissamik eqqarsaatigisarsimasaat qanoq iliuuseqarfiginiarneqarnersut takorusunnarsilerpoq.

Maanna Issittumi Siunnersuisoqatigiinni suliniutit pingaarutillit arlallit ICC siunnersuutiginneqataaffii akuerineqareerlutik qanoq ingerlanneqarnissaannik piarersaasiorfigineqarput.

Issittumi Siunnersuisoqatigiit siorna Nuummi ataatsimiinnerminni siunnerfigaat Issittumi suliniutini inunnut inuiaqatigiinnullu tunngasut salliutinneqassasut. Tamanna tunngavigalugu. ICC makku qanimut suleqataaffigissavai:

  1. Issittormiut oqaasii pillugit pilersaarusiornissaq
  2. Issittumi immat umiartorfigineqartarnerannut tunngasunik suliat ingerlateqqinnissaat
  3. Inuiaat Issittormiut inuiaqatigiittut sumut killiffiinik nalunaarsuineq
  4. Mingutsitsinermut tunngasuni FN-imi kviksølvimik mingutsitsinerup nungusarnissaanik isumaqatigiissusiornermi qanimut peqataaneq
  5. Issittup imartaani uuliamik gassimillu ujarlernerit upalungaarsimanermut tunngasumik ingerlaavartumik nalilersuinerit

Tamatumani aamma eqqaasitsissutigaarput ICC-p Issittumi pisuussutinik atuineq pillugu nalunaarutaa maajimi 2011-mi saqqummiunneqarpoq.

Suliat taakku annertuut saniatigut nunatsinni ICC-p ingerlatseriaasiani nutarterinerit ingerlanneqarput, suliassaqarfiit nutaat aamma nunat tamalaat akornanni suliat naammaginartumik suliaqarfiginiarlutigik. Taakku ilagaat maanna illumik allaffeqarfissamik pilersaarusiorneq allanik suleqateqarluta ingerlatileratsigu.

ICC Kalaallit Nunanni siunertaraarput nittartagaq atorlugu paasissutissat tunniussuunerisa saniatigut nunatta ilaani anngulluta paasissutissiuisarnissarput, siorna aallartikannereersoq. Tamatumani kattuffiit ilaasortarisavut suleqatigilluarlugit ingerlanniassavarput.

Ukiortaami maluginiagassat ilagaat ICC-mik tunngaviliilluni ataatsimeersuarnermit siullermit ukiut 35-nngussammata, aamma ICC Chukotka ukiunik 20- nngortorsiussammat. Taakku malunnartinniarlugit ICC-mi siulersuisut Chukotkami ataatsimiissapput juulimi 2012.

Carl Christian Olsen, Siulittaasoq
ICC Kalaallit Nunaat