English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Kalaaleq ataqqinaammik doktorinngortinneqartussanngorpoq

Aprilip 27-anni 2012

Inuit Issittormiut Siunnersuisoqatigiiffianni siulittaasoq Aqqaluk Lynge, Dartmouth College-mi, doktorinngortinneqartussanngorpoq amerikami universitetimi ilisimaneqarluartumi naalagaaffimmi New Hampshiremiittumi. Ataqqinaammik doktorinngussutaa tuluttut taaguuteqarpoq Doctor on Human Letters, kalaallisut Inuit Pisinnaatitaaffii pillugit Allaaserisani Ataqqinaammik.

Taamaalilluni Aqqaluk Lynge kalaaleqatini marluk malippai siusinnerusukkut ataqqinaammik doktorinngortinneqartut tassalu Naalakkersuisuni siulittaasuusimasoq Jonathan Motzfeldt, 1985-mi University of Alaskami Fairbanksimiittumi ataqqinaammik doktorinngortinneqartoq aamma professor Robert Petersen, 1992-mi Université Laval, Montreal, Canadamiittumi.

Aqqaluk Lynge 2006-miilli Dartmouth College qanittumik attaveqarfigilerpaa, tassani issittumi avatangiisit pillugit klimallu allanngoriartornera pillugu ilisimatuussutsikkut suliani ICC-lu suleqatigiinnissamik isumaqatigiisssusiornermigut. Tamatuma saniatigut Ilisimatusarfiup aamma Dartmouth Collegep akornanni ilinniartut paarlaasseqatigiittalernissaannik pilersaarummik pilersitseqataavoq. Taamaalilluni amerikami universitetip pineqartup USA-mi issittoq pillugu ilisimatusarnermi aalajangersimasunik sammisaqarfiusup pitsaanerpaat neqeroorutigisinnaanngorsimavai. Tamatuma saniatigut issittoq pillugu ilisimatusarnerit assigiinngitsut pillugit universitetimi immikkut sammineqarsinnaasut ingerlatarai.

2008-mi Aqqaluk Lynge Dartmouth Collegemi seniorforskeritut, immikkut ilisimatusartutut suliaqarluni ingerlataqarpoq taamanikkorniillu suliniutini immikkut sammisaqarfiusuni arlaqartuni peqataasalerpoq aamma universitetimi ataatsimeersuarnerni assigiinngitsuni oqalugiartuusarluni.

Immikkut ataqqinaataasuulluinnartumik doktorinngortinneqarneranut tunngaviupput, Aqqaluk Lyngep siammasissumik nunap inoqqaavisa inuttut pisinnaatitaaffii pillugit suliarisarpassui minnerunngitsumillu naggueqatigiit Inuit sinniisuattut ICC-mi nunat tamalaat akornanni, nunarsuup immikkoortuini assigiinngitsuni suliniaqatigiiffinni soorlu FN-ip Nunap Inoqqaavi Pillugit Ataatsimiitsitaliaani aamma Issittumi Siunnersuisoqatigiinni peqataasarsimanera. Universitetip ilanngullugu tunngavilersuutigaa Aqqaluk Lyngep politikikkut Kalaallit Nunaanni suleqataasimanera aammattaaq atuakkiortutut annertuumik saqqummersittarsimasai pillugit.

Aqqaluk Lynge Dartmouth Collegemi rektorimit ataqqinaammik doktorinngortinneqassaaq universitetip ukiumoortumik 9. juni 2012-mi nalliuttorsiortitsinerani.

Takuuk aamma: Dartmouth Now