English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Issittumi Siunnersuisoqatigiit aalajangiisumik ataatsimiittartuisa (SAO-t) ataatsimiinnerat

Issittumi Siunnersuisoqatigiit aalajangiisumik ataatsimiittartuisa (SAO-t) ataatsimiinnerat, ulluni novembarip 8. aamma 9.-anni ingerlasoq naammasseqammerpoq. Ataatsimiinnermi Issittormiut oqaasii pillugit suliniut aamma Issittup angallavigineqarnera pillugu suliniut naqissuserneqartunut ilaapput.

Ataatsimiinnermi angusat naammagisimaaqaavut, pingaartumik suliniutit marluk ICC-p ilusilersueqataaffigisai akuerineqarmata, ICC Kalaallit Nunaata siulittaasua Carl Chr. Olsen unnersiorpoq. Nangilluni oqaatigaa suliniutit taakku tamarmik inuiaat Issittormiut atugaannut tunngassuteqartuusut, taamaattullu Issittumi Siunnersuisoqatigiinni takussaanerusariaqartut.

Issittormiut Oqaasii pillugit suliniut ukiuni tallimani ingerlassassaavoq. Issittumi tamarmi nunat inoqqaavisa oqaasiisa inissisimanerat nalilersorlugu, malittaralugit aamma siuarsarlugit suliaq taanna ingerlanneqassaaq. Inuit Issittormiut Siunnersuisoqatigiiffiata suliaq taanna siuttuuffigissavaa, aammali oqaasilerisut suliamik paasisimasalittut toqqakkat qanimut suleqatigissavavut. Suliaq naalagaaffiit arfineq-pingasut tamarmik peqataafigissavaat nunat inoqqaavisa kattuffii allat aamma peqatigalugit.

Iluareqaarput Canada ilusilersueqataallunilu tapersersuimmat aamma USA-mi National Science Foundation suliap annertuup ilarujussua aningaasalersussammassuk. Taamaattoq Danmark, Kalaallit Nunaat Savalimmiullu akuersinerup nalaani oqaaseqanngimmata tupigilaanngitsuunngilarput, suliammi piareersarnera tamaat malittarinikuummassuk, Carl Chr. Olsen nangilluni oqarpoq.

Suliniutip aappaa taperserneqarmat nuannaarutigisarput tassaavoq AMSA II. Tassa Issittup Imartaasa umiartorfigineqarnissaata naggueqatigiinnut Inunnut sunniutissai pillugit suliut. Inuit Alaskamit, Canadamit, Chukotkamit Kalaallit Nunaannillu naapitinnissaat pilersaarutaavoq, Issittup imartaasa umiartorfigineqarnissasa sunniutissaat pillugit suliniut eqqartorneqassalluni qanorlu pinissaa nalilersorneqassalluni.

Issittup umiartorfiginissaanik suliniut ukiorpanni suliaareersoq naggueqatigiinnut Inunnut pingaarutilerujussuuvoq, Inuit sineriammiuugatta qanorlu pisoqarnissaa upalungaarsimaffigisariaqarlutigu. Aappatigullu aamma takusinnaavarput Issitttup umiartorfiginissaata aamma iluaqutissartaqarnissaa. Tassani atuisut apeqqusiaat atorlugit paasiniaavigineqassapput immat tamakku qanoq atugarineraat, siunissamilu sunniutissat qanoq takorloorneraat, Carl Chr. Olsen oqarpoq.

Issittumi Siunnersuisoqatigiit Luleåmi ataatsimiinneranni taperserneqarlutik eqqartorneqartut allat ilaatigut tassaapput:

  • Inuiaat issittormiut ineriartornermi inissisimaneranni misissuinerup nanginnera,
  •  
  • Issittumi uumassusillit assigiinngisitaarnerisa nalilersornissaat,
  •  
  • Imarpinni seernartoqalersarneq,
  •  
  • Tuttuutillit inuusuttaasa suliniarfiginissaat,
  •  
  • Imaani uuliamik mingutsitsineq, aamma
  •  
  • Inatsisitigut pituttuisumik Issittumi Ujaasisarnikkut Annaassiniartarnikkullu suleqatigiinnissamik isumaqatigiissut.