English
Dansk
Kalaallisut

E-mail iccgreenland@remove-this.inuit.org
Phone +299 323632 

Nunat inoqqaavi pillugit ataatsimeersuartoqalersoq

TUSAGASSIORFINNUT NALUNAARUT Maajip 29-at, 2011

Nunat inoqqaavisa atugaat pillugit 2014-imi Naalagaaffiit Peqatigiit (FN) nunarsuaq tamakkerlugu atatsimeersuartitsinissaat naqissuserneqarpoq FN-ip Nunat Inoqqaavisa Atugaat pillugit Isummersoqatigiiffiata New Yorkimi FN-ip qullersaqarfiani ataatsimiinnerani. Tallimanngormat 27. maj ataatsimiinneq naammassineqarpoq. Sapaatit akunnerini marlunni ataatsimiinneq nunarsuaq tamakkerlugu peqataaffigineqarpoq nunallu inoqqaavisa atugaat qitiutinneqarlutik eqqartorneqarput.

Inuuniarnikkut atukkat pitsanngorsimanersut takujuminaappoq

2014-mi ataatsimeersuarnissaq pingaaruteqarluinnartussaammat ataatsimeersuarnerup piareersarneqarnerani nunat inoqqaavisa toqqaannartumik peqataatinneqarnissaat piumasaraarput. Nunarsuatsinni nunat inoqaavisa inuuniarnikkut atugaat ukiuni kingullerni 20-ini nunarsuarmioqatigiinnit pitsanngorsaaffiginiarlugit qitiutinneqaraluartut, inuuniarneq pillugu angusat annikipput takujuminaallutillu, naak pisinnaatitaaffiit pitsanngorsarneqaraluartut, ICC-mi siulersuisuini ilaasortaq Hjalmar Dahl New Yorkimi sapaatip akunnerani kingullermi ataatsimiinnermi peqataasoq naliliivoq.

- Taamaattumik isumaqarpunga 2014-mi ataatsimeersuarnissamut nalilersueqqissaartariaqartugut maannangaarlu piareersarluta aallartittariaqartugut. Nunat inoqqaavisa pisinnaatitaaffii 2007-mi akuersissutigineqartut nunarsuarmioqatigiinnit qanoq atuutinneqartiginersut qanorlu ataqqineqartiginersut qulaajanerneqartariaqarput nalilersoqqissaartariaqarlutillu.

Nunat inoqqaavisa pisinnaatitaaffii naalagaaffinnit malitassatut inatsisinngorlugit inissinneqarnissaat 2014-mi ataatsimeersuarnermi aalajangiiffigisassatut siunnersuutigineqartariaqartut Hjalmar Dahlip ilanngullugu oqaatigaa.

2013-imi Norgip avannaani Saamit illoqarfianni Alta-mi ataatsimeersuarnissaq piareersarlugu FN ataatsimeersuartitsissaaq.