English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Nunat inoqqaavisa pisinnaatitaaffii nunarsuarmiut akuersaarpaat

TUSAGASSIORFINNUT NALUNAARUT Maajip 19-at, 2011

Ullut sisamassaani Permanent Forumip FN-imi ataatsimiinnerani nunat inoqqaavisa pisinnaatitaaffiisa atuutsinneqarnerata nalilersorneqarnerani paasinarsivoq nunarsuarmi naalagaaffiit tamarmik Naalagaaffiit Peqatigiit Nunat Inoqqaavisa Pisinnaatitaaffii pillugit Nalunaarutaat malinniarlugu nalunaarutigisimalerpaat. Ajoraluartumilli Ruslandi kisimi amiakkuulerpoq.

Ullumi ICC-p Tjukotkami siulersuisua Tatiana Achirginap Issittormiut sinnerlugit oqalugiarnermini Ruslandip naalakkersuisui kimigiiserfigai Pisinnaatitaaffiit pillugit Nalunaarut erniinnaartumik akuereqqullugu.

Ukioq 2012-imi ICC-p pilersaarutigaa Ruslandimi naggueqatitta nunaanni Tjukotkami ataatsimiinnissami pisortanik oqaloqateqarnissani Inuit Ruslandimi 1600-innanngorsimasut illersorneqarnissaat pillugu iliuusissat pillugit inuuniarnikkullu atukkat pitsanngorsaasariaqarneq pillugu.

Marlunngormat unnukkut FN-p illorsuata torsuusaani Nive Nielsen ulluni makkunani USA-mi immiussisoq Permanent Forumimi eqqumiitsuliortut allot ilagalugit nipilersorpoq erinarsorlunilu assullu alutorineqarluni, kalaallillu ICC-mit Inatsisartunillu najuuttut tulluusimaarutigeqisaannik.

ICC-p aallartitai siulittaasumik Aqqaluk Lyngemik siulersorneqartut tassaapput Kirt Ejesiak, Tatiana Achirgina, Hjalmar Dahl aamma Sara Olsvig.