English
Dansk
Kalaallisut

E-mail iccgreenland@remove-this.inuit.org
Phone +299 323632 

Issittumi Siunnersuisoqatigiit Ministeriisa ataatsimiinnerat Nuummi, Kalaallit Nunaat

TUSAGASSIUUTINUT NALUNAARUT Maajip 12-at, 2011

Nunat Inoqqaavisa Kattuffii allat tallimat peqatigalugit ICC Issittumi Siunnersuisoqatigiinni Aalaakkaasumik Ilaasortaavoq, Permanent Participant. Aalaakkaasumik ilaasortat nunat Issittumi Siunnersuisoqatigiinnut ilaasortat arfineq pingasuusut peqatigalugit Issittumut soqutiginaatilinnut tamanut suleqataapput, naak isumaqatigiinniutinut tunngatillugu taasisinnaanatillu atsioqataasinnaanngikkaluarlutik.

Ullumikkut Issittumi Siunnersuisoqatigiit ataatsimiinneranni Inuit Issittormiut Siunnersuisoqatigiiffiata, ICC -p Siulittaasuata, Aqqaluk Lyngep oqaaseqarnermini erseqqissarpaa Issittumi Siunnersuisoqatigiit nukittorsarnissaanni aalaakkaasumik ilaasortat peqataatinneqarnerat pinngitsoorani aamma isummerfigineqartariaqartoq.

”Neriuutigaarput siunissami issittumi naalagaaffiit aalaakkaasumillu ilaasortat tassaalissasut suliatigut tamatigut naligiillutik Issittumi Siunnersuisoqatigiinni ilaasortat, taamaasinikkummi Siunnersuisoqatigiiffik ullumikkornit nukittunerulissammat.” Aqqaluk Lynge oqarpoq.

Inuit Issittormiut Siunnersuisoqatigiiffiata aamma oqariartuutigaa nerisassaqarnermut tamakkuninngalu imminut pilersorsinnaanermut tunngasut immikkut isiginiarneqartariaqalersimanerat, Issittumilu Siunnersuisoqatigiinni suleqatigiissitat tamakkununnga tunngatillugu suliaat nersualaarlugu. ”Uumasoqatigiiaat peqqissut tassaapput kulturitsinnik attassiinnarnissatsinnut tunngaviusut”, Lynge oqarpoq, erseqqissarlugulu ”apeqqut nerisassaqarnermut tunngasoq tassaammat nunarsuaq tamakkerlugu piusoq aammalu tamanna tassaammat Inuit kulturitsinnut inuiattullu peqqissuunissatsinnut tunngaviulluinnartoq.”

Issittumi avatangiisit mianernartupilussuupput, naggueqatigiillu Inuit nunagisaminni suliffissuaqarnikkut annertusiartuinnartumik pisoqalernera mianernarluinnartutut isigaat. ICC-llu siulittaasuata eqqaavaa ”Issittumi pisuussutinik Inuit Nunaanni iluaquteqarneq pillugu Inuit tunngaviusumik najoqqutassatut Nalunaarutaat”, qanittukkut saqqummiunneqartoq.

”Nunatta pisuussutaannik atuerusuttut uagullu akunnitsinni suleqatigiinnissamut tunngaviusumik najoqqutassatut suliarisimavarput. Suliffissuaatillit, Issittumi naalagaaffiit allallu nunagisatsinnut tikiinnarlutik namminneq iluaqutissaminnik piiaasinnaanngillat. Neriuutigaarput Issittumi Siunnersuisoqatigiit nalunaarummi oqariartuutigineqartut isummersornerminnut ilaatissagaat.” Aqqaluk Lyngep ilassutigaa.

Inuit Issittormiut Siunnersuisoqatigiiffiata erseqqissarpaa issittumik ulorianartorsiortitsisoqaranilu peqqissuunissamut tunngaviulluinnarmat inunnut tunngasortaata puigorneqanngilluinnarnissaa. ”Issittoq isumannaatsuutillugulu peqqissuutittariaqarparput, sallaatsumik ineriartortitsineq ingerlallugu puigunngisaannarlugulu Issittumi Siunnersuisoqatigiit nukittoqutigimmassuk inunnut sammiviata ilannguttuaannarnera.”

Inuit Issittormiut Siunnersuisoqatigiiffiata Siulittaasua Aqqaluk Lynge World Debatemut Issittormiut Siunnersuisoqatigiivisa tusagassiortunik katersuutsitsinerisa kinguninngua BBC-mit immiunneqartussami aamma peqataassaaq.

Annertunerusumik paasisararusuttunut saaffissaq:
ICC-p Siulittaasuata allaffia
Aqqusinersuaq 3, 1
3900 Nuuk
+299 32 36 32
www.inuit.org