English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Issittumi pisuussutinik Inuit Nunaanni iluaquteqarneq pillugu Inuit tunngaviusumik najoqqutassatut Nalunaarutaat

TUSAGASSIUUTINUT NALUNAARUT Maajip 11-at, 2011

Tamanut tusarliunneqassaaq
Maajip 11-at 2011, nal. 17:00 – 18:00
Katuaq Ikinngutit Inaat Nuuk

Inuit siuttui Chukotkameersut (Rusland), Alaskameersut (USA), Canadameersut Kalaallit Nunaanneersullu februaarimi 2011-imi Ottawami ataatsimiipput, ataatsimiissutigalugit apeqqutit uuliamik gassimillu misissuinernut iluaquteqarnermullu tunngasut aamma aatsitassarsiornermi taakku sunniutissaasa misissorneqarnissaannut tunngasut, inuiaqatigiinnullu sunniutissaasa naliliiffigineqarnissaat samminiarlugit.

Ataatsimeersuarnermit inerniliussatut saqqummiussaq tassaavoq ”Issittumi pisuussutinik Inuit Nunaanni iluaquteqarneq pillugu Inuit tunngaviusumik najoqqutassatut Nalunaarutaat ”. Nalunaarut Nuummi atsiorneqassaaq maajip ulluisa 11-ani 2011, ICC-p siulittaasuanit Aqqaluk Lyngermit, ICC-llu siulittaasuisa tulliinit, Duane Smith (Canada), Jim Stotts (Alaska) aamma Carl Christian Olsen (Kalaallit Nunaat).

Inuit Issittormiut Siunnersuisoqatigiiffiat 2010-mi ataatsimeersuarnermini aalajangersaavoq Inuit Nunaanni pisuussuterpassuit nunarsuarmioqatitsinnit pilerigineqaraluttuinnarmata aamma silap pissusiata allanngorneratigut pissutsit atuutilersut, aatsitassarsiornermik ikummatissarsiornermillu ingerlataqarusuttut imaaginnalivissimammata, aamma tamatuma avatangiisinut pinngortitamullu kingunissaat annertunerusumik eqqartorneqarnissaat kissaatigisimavaat. Naggueqatigiit Inuit suleqatigiinnerminni toqqammavigiuarpaat pinngortitap nukiinik mianerinninneq pissutsillu inuit namminneq qanoq iliuuseqarfigisinnaanngisaat pillugit naammagittassuseq nakimaassuserlu siulitsinnit attassarput toqqammavigalugu allannguutinut nalimmassarsinnaassuserput pigiuaratsigu tamannalu timikkut tarnikkullu ineriartornermi tamatigut tunaartariuarsimagatsigit.

“Issittumi pisuussutinik Inuit Nunaanni iluaquteqarneq pillugu Inuit tunngaviusumik najoqqutassatut Nalunaarutaat “ ineriartornermi piumasaqaataasut minnerpaaffissaat pillugit nalunaarusiaavoq, naalakkersuisut qullerpaartaannut Namminersornerullutik imaluunniit Namminersorlutik Oqartussaasunut, suliffeqarfissuarnut allanullu tamakkuninnga iluaquteqarniarluni suliaqartunut tamanut maligassanngortinniarlugu.

“Issittumi pisuussutinik Inuit Nunaanni iluaquteqarneq pillugu Inuit tunngaviusumik najoqqutassatut Nalunaarutaat” tamanut tusarliunneqassaaq Nuummi maajip 11-ani Katuami Ikinngutit inaanni peqatigalugit siulittaasup tullii; Duane Smith, Canada, Jim Stotts, Alaska, Carl Chr. Olsen, Kalaallit Nunaat
Tusagassiuutinik katersortitsinermi oqaatsit makku atorneqassapput: Inuttut, tuluttut aamma danskisut.

Saaffigisassaq:
Inuit Issittormiut Siunnersuisoqatigiiffianni Siulittaasup allaffeqarfia
Aqqusinersuaq 3.1
3900 Nuuk
+299 32 36 32
www.inuit.org

Pisussat:

17:00 ICC-p siulittaasua Aqqaluk Lynge tikilluaqqusissaaq

17:10 Atsioqatigiinneq:
Aqqaluk Lynge, ICC-p Siulittaasua
Duane Smith, Siulittaasup tullia, Canada
Carl Christian Olsen, Siulittaasup tullia, Kalaallit Nunaat
Jim Stotts, Siulittaasup tullia, Alaska
(Tatiana Achirgina, Siulittaasup tullia, Chukotka)

17:20 Nalunaarutip saqqummiunneqarnera

17:30 Apeqqutit akissutillu

18:00 Tusagassiortunik katersortitsineq naassaaq