English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

ICC-Kalaallit Nunaat nutaanik siuttoqalerpoq

Allattoq: Hjalmar Dahl, ICC-Kalaallit Nunaata siulittaasua, oktobari 2014

Juli-mi 2014 ICC-p Inuvimmi ataatsimeersuarnerata inerniliussaa Kitigaaryunnit Nalunaarut tamatsinnut annertuunik pisussaaffiliivoq. Ukiuni tulliuttuni sisamani pisussaaffiit naammassiniarnissaannut ICC-Kalaallit Nunaat piareersimavoq. ICC-p siulersuisuuneri januar-imi 2015 siullermeerlutik ataatsimiinneranni suliassat pingaarnersiorneqassapput agguataarneqarlutillu.

Siulersuisut nutaat toqqarneqarneqarneranni ICC-mi Aallartitat tamarmiusut oqariartuutigaat Kalaallit Nunaata Inuit suleqatigiinnerannut Issittullu allanngoriartortup unamminartuanut peqataajuarnissaa tapersersorlugu. Taamaammat ICC-p Issittoq pillugu Siunnersuisoqatigiinni, Naalagaaffinni Peqatigiinni nunarsuarlu tamakkerlugu suleqatigiiffinni naapertuuttuni allani, Inuit tusarneqarlutillu isummaminnik saqqummiiffigisinnaasaanni, peqataasarnini ingerlatiinnassavaa. Piffissami qaninnerusumi anguniagaavoq siunissami Issittoq aamma tassaalissasoq Issittoq pitsaanerusoq - inunnut, kulturimut, peqqissutsimut, aningaasaqarnermut, pinngortitamut avatangiisinullu naleqqiullugu.

Nunatsinni aatsitassarsiornermut tunngasutigut pilersaarutinut atatillugu innuttaasut pitsaanerusumik peqataatinneqartarnissaat siunertaralugu WWF Danmark peqatigalugu suliaqarpugut. Suliniummi tassani suleqatigiinnerup ingerlaqqinnissaa sulissutigaarput, neriuutigaaralu tamanna ukiumi nutaami nangeqqissallutigu.

Suliavut allat taagunngikkaluarlugit innutaasunik malinnaatitsinissaq innuttaasullu tikillugit paasititsiniaasarnissarput pingaartippara. Ukiuni aggersuni angalasarnikkut tamanna anguniassavarput.

Nittartakkatsinnut tikilluaqqoqqillusi oqaatigissavara, piffissami aggersumi nittartagarput nutartissammat. Nittartakkatta nutarternera aqqutigalugu paasissutissanik  ajornannginnerusumik pissarsisarnissaq anguneqassammat.

ICC-p Inuvimmi ataatsimeersuarnerani juli 2014-imi ingerlanneqartumi ICC-p nunat tamat akornanni ukiuni kingullerni siulittaasorisaata Aqqaluk Lynge-p akisussaaffik Okalik Eegeesiak-mut Canadameersumut tunniuppaa, taannalu nunat tamat akornanni ICC-mut siulittaasuussaaq tullianik 2018-imi ataatsimeersuarnissap tungaanut.

Aqqaluk Lynge aamma Carl Christian Olsen (Puju), tamarmik ICC-p pilersinniaqqaalaarneraniilli killiffinni tamangajalluinnarni peqataasimasut, ilutigisaanik aammattaaq nunat tamat akornanni siulersuisunit tunuarnissartik toqqarpaat, tamatumalu nassataraa ICC-Kalaallit Nunaata suliassat isumaginissaannut nutaanik inuttaliinera.

Iluatsillugu Aqqaluk Pujulu ukiorpassuarni naggueqatigiit Inuit sinnerlugit sulisimanerannik qamannga pisumik qutsavigaakka.

ICC-Kalaallit Nunaata kingullermik ataatsimeersuarnerani 2. maj 2014 pisumi Martha Abelsen uangalu toqqarneqarpugut, ICC-p nunat tamat akornanni siulersuisuinut ilaasortassatut. Tamatuma kinguneraa ICC Kalaallit Nunaanni siulittaasunngornera Martha Abelsen siulittaasup tullinngorluni. Taamatuttaaq ICC- Kalaallit Nunaata siulersuisuini ilaasortaapput Karl Kristian Kruse, Aqqaluk Lynge, Aili Liimakka Laue aamma Nuka Kleemann, Aallartitat Siulittaasuat taaseqataasinnaanani peqataasartussatut.

Nittartakkatsinnut tikilluaritsi.

Hjalmar Dahl

ICC Kalaallit Nunaanni siulittaasoq