English (United Kingdom)
Dansk
Kalaallisut

E-mail iccgreenland@remove-this.inuit.org
Phone +299 323632 

Nunat Inoqqaavi EU-lu

Tusagassiorfitsigut nalunaarut, Nuummi, marsip 21-anni 2015

Nunatsinni Inuit Issittormiut Siunnersuisoqatigiiffiit (ICC) ulluni 23. aamma 24. marts EU-p nunat inoqqaavinut tunngatillugu anguniagassaanik nutarterinissaq siunertaralugu Bruxellesimi ataatsimeeqatigiinnissamut qaaqqusaavoq. ICC-p nunatsinni siulittaasua Hjalmar Dahl nunat inoqqaavisa sinniisoqarfii allat peqatigalugit ataatsimiinnermi peqataassaaq.

- "Ataatsimeeqqatigiinnissaq pissanganarpoq, pingaartumik EU-mit qaqutigut nunat inoqqaavinut tunngatillugu qaaqqusaassaratta", Hjalmar Dahl oqarpoq.

Hjalmar Dahlip nangilluni oqaatigaa, soorunami nunat inoqqaavisa pisinnaatitaaffiinik taakkulu atuutilersinneqarnissaat siunertaralugu EU-p illersuinissaanik piviusunngortitsiniarlunilu suliniuteqalernissaanik kaammattuuteqassalluni.

- "Pisinnaatitaaffit ilagivaat nunat inoqqaavisa pisuussutiminnik atuisinnaatitaanerat taakkuninngalu aningaasarsiornikkut ineriartortisinnaanerat. Puisit amiinik naggueqatigiit Inuit EU-mut eqqusseqqusaajunnaavinnissaannik siunertaqartumik oqariartuutit akuerisinnaanngilluinnaripput aamma oqariartuutissama ilagissavaat", Hjalmar Dahl aallanngitsiarluni oqarpoq nangillunilu;

- "EU-p naggueqatigiinnut Inunnut ukiorpassuarni nuanninngitsunik pissusilersortuarnera aningaasarsiorsinnaanitsinnillu akuerineqarsinnaanngilluinnartumik killilersuiuarnerata takutippaa, pissutsit taamaattut atuutsillugit EU-p nunat inoqqaavinut politikkia siunissami pitsanngornavianngitsoq", Hjalmar Dahl naggasiivoq.

Hjalmar Dahlip naggasiinermini ilanngullugu oqaatigaa EU-p puisit amiinik EU-mut eqqusseqqusaajunnaavinnissamik anguniagaqarnera naggueqatigiittut piniartortatsinnut naggueqatigiillu Inuit tamaasa ataatsimut isigalugu saassussinerusoq, nammineq ineriartornissamik ingerlatsinissamillu pisinnaatitaaffitsinnik imaannaanngitsunik innarliisussaq.

Ataatsimeeqatigiinneq EU-p Inuit Pisinnaatitaaffiinik Anguniakkanillu Ingerlatsiviata aqqissuussaraa.

Hjalmar Dahl

Mobiili: +299 556126