English
Dansk
Kalaallisut

E-mail iccgreenland@remove-this.inuit.org
Phone +299 323632 

Siulersuisuunerit ataatsimiinnerat nunatsinnit siulittaasumit iluarisimaarneqarpoq

Tusagassiorfitsigut nalunaarut, Nuuk 16. januar 2015

Inuit Issittormiut Siunnersuisoqatigiiffiata (ICC) siulersuisuisa ataatsimiinnertik 15. januar 2015 naammassivaat. Ullunik pingasunik sivisussuseqartumik ataatsimiinnermi Alaska-mi, Canada-mi, Tjukotka-mi nunatsinnilu allaffeqarfiit akornanni suliassat agguataarneqarnissaat eqqartorneqarpoq aalajangiiffigineqarlunilu.

Ataatsimiinnermi angusat nunatsinni siulittaasumit Hjalmar Dahl-imit iluarisimaarneqarput, pingaartumillu ukiuni sisamani aggersuni nunatsinni ICC-p immikkoortortaanut suliassiissutigineqartut nuannarineqarlutik. Maannamut Naalagaaffiit Peqatigiit tungaatigut suliassaasut qitiutillugit ICC Kalaallit Nunaanni suliarineqartarsimapput, tamannalu ukiuni sisamani tulliuttuni nanginneqartussanngorluni. Naalagaaffiit Peqatigiinni sulinissaq nunat inoqqaavisa pisinnaatitaaffii pillugit piginnaatitsinikkut ingerlassat pingasuusut, tassaasut Nalagaaffiit Peqatigiit Nunat Inoqqaavisa Atugaat pillugit Isummersoqatigiiffiat (FN´s Permanente Forum for Oprindelige Folks Anliggender), Naalagaaffiit Peqatigiit Immikkut Ilisimasallit Nunat Inoqqaavisa Atugaannik Nalunaarusiortartui (FN´s Ekspertmekanisme vedr. Oprindelige Folks Rettigheder) kiisalu Naalagaaffiit Peqatigiit Nunat Inoqqaavisa Pisinnaatitaaffii pillugit immikkut Nalunaarusiortartua (Den Særlige Rapportør om Oprindelige Folks Rettigheder) qitiutinneqassapput.

Taamatuttaaq Issittumi Siunnersuisoqatigiinni tassanilu suleqatigiissitaliani arlalinni ilaatigut piujuaannartitsinissaq tunngavigalugu ineriartortitsinermik, assigiinngitsutigullu mingutsitsinermut tunngasunik Issittumilu inuiannut peqqinnarnerusumik avatangiiseqarnissamut atasunik suliaqartut peqatigalugit ICC ilungersuuteqarniarpoq. Taakkununnga ilanngullugu oqaatsit kulturilu pillugit suleqatigiissitaliani ICC-p suleqataanini nangissavaa.

Suliassat agguataarnerisa saniatigut ataatsimeersuartitsinissat marluk piareersarneqalernissaat ICC-mi siulersuisunit salliutinneqartunut ilaatinneqarpoq:

Issittoq Kaajallallugu Aningaasaqarneq pillugu Inuit Siuttuisa Ataatsimeersuarnerat, tassanilu ingerlatseqatigiiffiit Inuit ingerlataat akunnerminni suleqatigisinnaasaminnik ujartuinissaat ilisimasanillu pigineqartunik paarlaateqatigiinnissap annertusarneqarnissaa siunertaassaaq, aamma;

Pisuussutinik Atuineq pillugu Inuit Siuttuisa Ataatsimeersuarnerat, tamatumanilu nerisassanik qulakkeerinninnissaq akunnitsinnilu immitsinnnut pilersorsinnaanitsinnut periarfissat pitsaanerpaat ujartornissaat qitiutinneqassallutik.

Siulersuisut ataatsimiinerisa kingorna Naalakkersuisut siulittaasuat Kim Kielsen ataatsimeeqatigineqarpoq, oqaloqatigiinnermilu ICC-mi nalinginnaasumik suliarineqartut, ataatsimeersuarnermi inaarutaasumik oqaaseqaat isumaqatigiissutigineqartoq kiisalu ukiuni sisamani tullinnguuttuni anguniakkat, ilaatigullu ataatsimeersuartitsiniarnerit marluk qulaani taaneqartut, saqqummiunneqarlutillu oqaluuserineqarput.

ICC-p siulersuisuunerisa ataatsimiinnissaat tulleq pissaaq augustusimi illoqarfimmi Berthelimi.

Annertunerusumik paasisaqarusukkaanni saaffiginniffissaq: Hjalmar Dahl, oqarasuaat 32 36 32